2025 foi un añu mui bayurosu pa la música asturiana, con una montonera llanzamientos publicaos d’estilos mui estremaos: folk, rock, canción d’autor, gaita, pop, indie, electrónica, tradicional, celta, pa la reciella… Sicasí, cada vegada son menos los trabayos que s’editen en formatu físicu. Equí facemos un repasu de les quince referencies disponibles en musicasturiana.com que s’asoleyaron dende xineru d’esti añu hasta avientu en CD, vinilu o llibru-discu. Tamién incluyimos un llibru rellacionáu cola música’l país y un álbum que, pesie a que tea en formatu dixital, la descarga inclúi audios a máxima calidá, semeyes y llibretu. Ye una escoyeta pa regalar música n’asturianu y gallego-asturianu nestes navidaes.
A lo llargo 299 páxines esti llibru supón el primer estudiu monográficu sobre’l floréu de gaita que se fai n’Asturies, una de les manifestaciones idiomátiques del instrumentu más propies y identitaries del patrimoniu musical del país.
LÏBRE ye grupu creáu por componentes de Misiva, Mala Reputación, Desakato y Origen. La so música tien influencies rock, canción d’autor y pop alternativu. Dos de los temes d’esti EP tán n’asturianu: ‘L’Ablugada’ (nomináu al XVII Premiu Camaretá) y ‘Acabalgamos’.
Cantares de Tierra y Mar ye’l primer discu de Nuramay. Esti dúu de «folk intimista» formáu por Maxi Areñes a la guitarra y Maitetxu Isla a les voces fai un repasu per un repertoriu formáu por «munchos romances de tola península, dalgún d’ellos sefardí, vieyos cantares en llingua catalana, y por supuesto, temes propios n’asturianu».
Primer trabayu Guieldu, banda de música celta. Ta formáu por catorce temes que puercuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. Un cuidáu trabayu qu’entemez temes de composición propia y d’orixe tradicional.
Entós ye un tríu folk de cámara formáu por Celia Nieto -vigulín-, Adrián Argüelles -flauta- y Javi Menéndez -cuerdes-, El so primer EP ye un trabayu discográficu que mira al folk dende perspectives estremaes. Esti discu nun ye un formatu físicu, pero la descarga dixital inclúi audios a máxima calidá, portada, contraportada, testu de presentación, agradecimientos y semeyes
Octavu discu del polifacéticu artista y estudiosu de la música’l país Héctor Braga. Nél amuesa’l so soníu más folk, más celta y más rockeru a lo llargo de diez temes nos que rescamplen destacaes collaboraciones y nos que la gaita rabil o zanfona ye la protagonista.
Vou ye’l primer trabayu de Vero Rubio qu’inclúi 11 temes. Nél van de la mano música, palabra y imaxe. Como desplica la multiinstrumentista «cada pieza del proyectu, instrumental o vocal, tien un poema/lletra y un videu que la acompaña, como tres caminos que lleven al mesmu destín». El trabayu edítase en dos formatos estremaos: un CD y un llibru, que contienen caún unes característiques concretes.
Resollu ye’l tercer trabayu de la Banda Gaites Llacín. L’álbum ta formáu por doce temes que ponen un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior.
La rabia nos dientes ye’l segundu trabayu d’Ochobre. L’álbum ta formáu por nueve temes que reflexen la so evolución. Musicalmente ye punk-rock con influencies tamién d’otros sones como’l punk melódicu, hardcore, celtic punk o metal. En cuantes a les lletres hai munchu pesu social, munchu compromisu y muncha conciencia de clase.
Cenicientes ye’l cuartu discu de Marisa Valle Roso y fórmenlo diez cantares qu’entemecen el folk con el pop y los instrumentos electrónicos qu’apaecen na gran mayoría de los sos temes, asitiando esta obra nueva en dalgo innovador y fresco. Les lletres son una hestoria de les que nun s’escaecen y pon como protagonistes a les muyeres y les sos reivindicaciones
Tsacianiegas ye’l dúu formáu poles hermanes Raquel y Laura Álvarez Alonso. Pa bail.lare ta formáu por 26 pistes de les que 25 son temes nos que se fai un repasu del repertoriu del Val.le de L.laciana y zones de la redolada, como’l suroccidente asturianu.
Primer discu en solitario de Rubén Bada. Ye un trabayu dividíu en tres partes: ‘Cantares’, ‘Vigulín’ y ‘Guitarra’ qu’amuesen la visión más personal del músicu al traviés d’igües y composiciones nueves. El resultáu son un total de 22 temes nos que suenen xiraldilles, xotes, dances, rumbes, muñeires, sones d’arriba…
Cancioneru ilustráu por Pedro Balmaseda qu’inclúi un CD coles canciones más populares de la Pop Piquiñín y tamién los sos últimos singles, traducíos por primer vez al asturianu pa esta cuidada edición.
Quinto trabayo del grupo de rock en gallego-asturiano Bacotexo. Nél presentan nove cancióis que, inda dentro del estilo del rock, móvense en rexistros que poden suar ben diferentes: dende el rock clásico hasta el pop-funk, dende el grunge hasta as estructuras más complexas. As lletras xiran en torno a os cambeos vitales y fainlo con úa mezcra de señardá y de vitalismo
El décimu discu d’estudiu de Los Berrones, Ta too podre, ye un álbum qu’afonda nos problemes y contradicciones de la vida actual pa tresformalos en cantares enllenos d’ironía, crítica social y humor. Too ello col inconfundible soníu que caracteriza a los creadores del agro-rock.
Suscríbite a les nuestres novedaes
