L’artista Ferla Megía presenta «Xatu«, single nuevu y primer adelantu del so próximu EP, que va asoleyar esta seronda. Grabáu y producíu pol propiu artista, «Xatu» caracterízase por una fusión de soníos que Ferla define como dembow rural. El tema surdió d’un procesu espontaneu y esperimental: «Fice’l 90% de la producción nun mesmu día mientres esperimentaba con soníos. Dempués, durante esa selmana, fui puliendo la mezcla», comenta Megía.
El cantar, compuestu en payares de 2023, destaca pola inclusión de la pandereta y la influencia d’artistes como Tokischa. Amás, incorpora un estribillu basáu na tonada tradicional «Cabruña y siega», interpretada por Diagmina Noval. Inclúi tamién un sampleáu de «La moto Pachín» -na versión de Los Berrones– xunto a una referencia a «L’automne est las» de Manu Chao, que faen de «Xatu» un orixinal amiestu de soníos tradicionales y contemporáneos.
El llanzamientu de «Xatu» vien acompañáu d’un videoclip grabáu nel monte Peña Careses, cerca de la casa del artista. Filmáu xunto al so amigu Cosme y con un estilu inspiráu nos rap ensin corte de Foyone, el videu realizóse en condiciones climatolóxiques adverses. «Llovía y había una borrina horrible, y na tercer toma cayó un rayu qu’allumó tol cielu. Foi épico», comenta Ferla.
Cuatro años de camín
La historia musical de Ferla Megía ye la d’un artista n’evolución. En 2020, decidió que’l so proyectu anterior nun espeyaba la so visión musical. Entamó a esplorar un enfoque más intimista y, nesi mesmu añu, presentó’l so tema «Algún día». En 2021 llanzó’l so primer EP, Fruto de la memoria, con un estilu más cercanu al R&B. Tres d’estos trabayos, dedicóse a afondar na música de raigañu y a reconeutar coles sos influencies tradicionales. En 2023 retomó’l so proyectu asoleyando dellos singles de manera independiente, a la gueta de nueves sonoridades y calteniendo la fidelidá a los sos raigaños; dos aspeutos reflexaos en «Xatu».
Suscríbite a les nuestres novedaes
