La Banda Gaites Saxum entama un festival nuevu esti fin de selmana nel Parque Fluvial de Viesques: Xixón Folk. La programación inclúi una nueche en danza, nueche folk, taller de baille tradicional, pasucáis, mercáu tradicional, talleres, actuaciones y otres actividaes. L’eventu entama’l próximu vienres 27 de setiembre a les 17h cola apertura del mercáu tradicional y los talleres artesanales y espárdese hasta’l domingu 29.
El vienres 27, la música tradicional va sonar dende les 18h y, una hora más tarde, Sergio Buelga -de la Compañía Asturiana de Comedias- va dar el pregón. Más tarde, el Grupu Folklóricu Trebeyu va impartir un taller de baille previu a la Nueche en Danza -22h- na que van participar, amás, la BG Saxum, Soi Panderetera -alumnes de la EMT La Quintana- y Pandereteros d’Anguañu.
Na tarde del sábadu 28, delles bandes de gaites (entá por confirmar) van desfilar nun pasucáis a les 17.30h p’alcontrase, a les 18.30h, na carpa. A partir de les 23h, los grupos Aira da Pedra (El Bierzo) y Corquiéu van dar dos conciertos na Nueche Folk del festival. El domingu 29, la sección de Coros y Danzas del Real Grupo de Cultura Covadonga va facer una actuación a les 12.30h. Dos hores dempués va haber una xinta en comuña na carpa y, a les 17h, Rollu Folk zarra’l festival con un conciertu. Esti nuevu eventu vien a ampliar la programación folk de Xixón escoyendo’l barriu de Viesques como escenariu.
La programación completa puede consultase equí:
Suscríbite a les nuestres novedaes
