Ferla Megía estrena’l videoclip de ‘«‘Xatu’, una nueva propuesta audiovisual que lleva unu de los sos cantares más reconocíos a un escenariu natural y que, nesta ocasión, puede esfrutase en formatu 360º. La pieza, dirixida por Antonio Llaneza, foi grabada a más de 1.900 metros d’altura, nel picu María los Corros, nel macizu de Les Tres Maríes.
La elección de la montaña nun ye casual. Llaneza y Megía conocéronse precisamente nel ámbitu de la escalada y les rutes de montaña, y yá trabayaren xuntos anteriormente nel videoclip de ‘Tiempu!’. Agora vuelven collaborar pa dar una nueva dimensión visual a ‘Xatu’, una canción na que Ferla Megía combina la so particular manera d’entender la música asturiana con soníos contemporáneos. El formatu 360º fai que’l videoclip tenga un componente especialmente inmersivu: l’espectador puede mover la perspectiva y explorar l’espaciu que rodea al artista, descubriendo’l paisaxe de montaña dende distintos puntos de vista.
‘Xatu’ forma parte de Páxaros 01, el trabayu de Ferla Megía publicáu en 2024, y foi el cantar col que l’artista consiguió’l Premiu Camaretá al Meyor Cantar 2025, reconocimientu a la creación musical n’asturianu y eonaviegu.
Con esti videoclip, Ferla Megía recupera y amplía l’universu de ‘Xatu’, apostando por una propuesta audiovisual distinta que xune música, paisaxe y tecnoloxía. El resultáu ye una esperiencia pensada pa ser vista y esplorada, y que convierte’l paisaxe asturianu nun protagonista más del cantar.
Suscríbite a les nuestres novedaes
