El pasáu sábadu 14 de febreru la tienda de Puru Remangu d’Uviéu acoyó la presentación del formatu físicu qu’axunta los EPs Páxaros 01 y Páxaros 02, que Ferla Megía asoleyó en 2024 y 2025. L’artista sierense y la so axencia, Lacre, llanzaron una edición llimitada de 200 unidaes d’un vinilu tresparente y con carpeta gatefold diseñada pol propiu Megía. Esti álbum tamién ve la lluz en CD y nél pue sentise electrónica, pop, música tradicional asturiana, reggaeton, boleru, canción d’autor… l’universu sonoru d’un artista vanguardista y multidisciplinar qu’aportó a la música’l país pa traer aire nuevo a la escena.
Na presentación Ferla Megía marcóse, como afirmó, «un tiny desk» -o un Amosando, na so versión asturiana-, y interpretó en formatu acústicu cuatro de los doce cantares que contién el trabayu. Entamó con ‘Conseyu’, el tema que tien xunto a Tania Pereira -que lu acompañó nesti showcase– y qu’anovó meciéndolo con una versión de Rusowsky. Siguió-y ‘MIÑANCES’23’, corte nel que reinterpreta’l Corri-Corri de Cabrales, faciendo d’esta manera l’artista alcordanza del tiempu nel que vivió nesti conceyu.
Con un breve parón pa entrugar al públicu qu’enllenaba la tienda de Puru Remangu a ver si queríen entrugar daqué al rodiu’l diseñu o’l discu en xeneral, el músicu sierense yá llevantáu y a los mandos de la so caxa ritmos, dio pasu ‘tiempu!’, tema qu’abre Páxaros 02. «Andamos mui apuraos y falten momentos pa disfrutar colos colegues», reflexó Megía nesti cantar que reivindica vivir seliquino.
El ramu púnxolo ‘Nun‘ esa guapura de boleru bachateáu nel que canta Rita Ojanguren, faciéndolo n’asturianu per primer vez. L’artista carbayona tamién acompañó a Megía nesta ocasión y los dos bromiaron alcordándose cómo foi la grabación de la collaboración, con Ojanguren embarazadísima; tanto, que la so fía acabó naciendo esa mesma selmana. Esti cantar zarra’l trabayu y tamién despidió’l showcase, al que siguió venta y firma de vinilos y CDs ente’l numberosu -y xoven- públicu qu’acudió a la llamada de Ferla Megía, Lacre y Puru Remangu.
Con esta presentación entamó una xira que pel momentu va llevar a esti artista a Llión (19 febreru), Ourense (20 febreru), A Coruña (21 febreru), Taberna Narciso (28 febreru), Teatru Xovellanos (4 marzu) y Festival Interceltique Lorient (1 d’agostu).
Suscríbite a les nuestres novedaes
