Fernando Valle Roso y Silvia Moreno asoleyen ‘Cantares de… y pa neñ@s’
Yá ta a la venta en formatu físicu y en toles plataformes dixitales ‘Cantares de… y pa neñ@s‘, el discu conxuntu de Fernando Valle Roso y Silvia Moreno. El dúu compila nesti trabayu diez pieces tradicionales que presenten asina:
«La música asturiana cuenta con bien de cantares empleaos por neños, rapazos y mozos nos sos xuegos y actividades cotidianes. La radio y la televisión fueron arrequexando col tiempu estos cantares tradicionales, faciendo que la xente los escaeciera en beneficiu d’otros sones y d’otros cantares. De manera que, d’entós p’acá, varies xeneraciones d’asturianos perdieron dafechu’l contactu con ellos, a nun ser nel círculu familiar o d’amistá más cercanu.
Esti proyectu nació fai años como conciertu didácticu col oxetivu de tresmitir estos cantares nos centros escolares asturianos a les futures xeneraciones. Agora, la idea ye desarrollalu en formatu discográficu.
Ente los temes escoyíos pa esti discu alcuéntrense sones empleaos na danza, corros, bailles, cantares de neños, hestories…».
