Preséntase’l programa completu de les I Xornaes del Vigulín tradicional n’Asturies

Piloña recupera la memoria de más de 60 vigulineros del conceyu.

El próximu fin de selmana L’Infiestu acueye les I Xornaes del Vigulín Tradicional n’Asturies, un eventu qu’axunta conferencies, talleres, música en directo y fotografía. L’asociación LaKadarma -organizadora de les xornaes xunto col Ayuntamientu de Piloña- vien de presentar el programa pa los díes 17, 18 y 19 de setiembre, con unes actividaes que reivindiquen la tradición del vigulín nel conceyu como una seña d’identidá cultural única dientro’l panorama de la música tradicional asturiana.

Les xornaes arranquen el vienres 17 a les 17.30h cola inauguración na Casa de Cultura de L’Infiestu de la esposición El vigulín tradicional nel conceyu de Piloña, cola intervención de Rodrigo Joglar y Xosé Antón Fernández “Ambás”. Media hora depués, va ser Dolfu R. Fernández el qu’imparta la conferencia Acercamientu al vigulín asturianu como instrumentu de tradición popular. Y pa rematar la primer xornada, a les 20h va cellebrase la Xuntanza de Vigulineros Asturianos.

El sábadu 18 de 10h a 13.30h y de 16 a 18h, Dolfu R. Fernández y Rubén Bada van impartir la primer sesión del cursu El vigulín na tradición asturiana. Repertoriu y técniques interpretatives, que va continuar al día siguiente de 10h a 13.30h pa poner fin a les xornaes. Les actuaciones en directo nun van faltar tampoco nestes xornes y a les 21h del sábadu la Piscifactoría del Orrín va acoyer los conciertos de ¿Aú? y los gallegos Caldo. Amás, va fallase’l premiu del I Certame de Fotografía Pepe de Güela.

Tradición vigulinera en Piloña

«Convertir Piloña na capital del vigulín tradicional» ye la firme voluntá de los organizadores d’estes xornaes. Dende LaKadarma destaquen el bultable númberu d’intérpretes d’esti instrumentu na música popular ente’l sieglu XIX y finales del XX (más de 60 namás en Piloña) y nagüen por recuperar una estaya de la música asturiana de la qu’opinen que «nun tuvo’l xorrecer que sí tuvieron otres manifestaciones como la gaita o’l baille tradicional». 

Dexa un comentariu

X