“Fierro, Carbón y Metralla” y Bimenes UnderPrau, nel aniversariu de La Revoltosa

Esti mes d’avientu la llibrería-café xixonesa La Revoltosa cumple 10 años de vida. Pa festexalo ta programando una serie d’actividaes dientro de les qu’hai presencia de música n’asturianu. El miércoles 6 d’avientu a les 19.30h el músicu David Varela y l’escritor Paco Álvarez van interpretar l’espectáculu Fierro, Carbón y Metralla, mientres que’l vienres 8 a les 20h hai conciertu del proyectu d’electrónica y rap n’asturianu Bimenes UnderPrau. Toles actividaes son de baldre y nel propiu llocal de La Revoltosa.

Fierro, Carbón y Metralla ye una llectura dramatizada de dellos de los testos más destacaos d’Álvarez acompañaos de los sones de Varela. Como presenten dende la Hoja de Lata, la editorial responsable del proyectu «ente ellos dialoguen con una propuesta musical na que lo mesmo suena un compás aceleráu de les Highlands qu’una añada suavina cola que apaciguar l’espíritu del públicu». Xunto a la pallabra y la música tán tamién les imáxenes de fondu que dirán sucediéndose p’acompañar «unes histories con protagonistes que pisen fuerte nel so tiempu y llugar, xente esmolecío por aportar daqué bono a la so realidá». 

Per otru llau, Bimenes Underprau ye un proyectu formáu en 2018 en Bimenes pol astur-madrilanu Pablo M. Testa pa esperimentar cola música electrónica y la narrativa sonora. Tres adentrase nel hiphop en 2021 cola maqueta Pelo Segao, en 2022 llanzó’l so sestu álbum Fesoria y Garabatu. N’él axunta electrónica, hiphop y lletres n’asturianu de calter políticu y reivindicativu a lo llargo de diez temes nos que la esperimentación sonora ta bien presente, abriendo asina un camín distintu dientro de la escena del rap n’asturianu.

Dexa un comentariu

X