El músicu David Varela y l’escritor Paco Álvarez dan forma al espectáculu “Fierro, carbón y metralla”
Tres de los nomes más destacaos de la cultura asturiana -el músicu David Varela, el periodista y escritor Paco Álvarez y la editorial Hoja de Lata-, únense pa dar forma a un proyectu qu’axunta música y lliteratura: “Fierro, carbón y metralla”. Esti espectáculu de 70 minutos va poder vese a lo llargo d’esti 2021 en delles cases de cultura del país y asina lu presenten dende Hoja de Lata Editorial, la promotora d’esta iniciativa.
«¿Qué puede surdir si xuntamos a ún de los autores más reconocíos de les lletres asturianes con un músicu (non tan) tradicional con un currículu de siete fueyes? ¿Quién será a imponese? ¿El ruxerrux de la curdión diatónica de David Varela o la narración vibrante de Franscisco Álvarez? ¿Serán a amestase nun filo narrativu per igual o dirá cauna a la suya? ¿Contarán dalgo prestoso o valdrá más que volvamos a mirar pa les redes sociales?.
FIERRO, CARBÓN Y METRALLA. Música y lletres pa una tarde ensin interné ye una llectura dramatizada de cachos de la meyor narrativa del escritor con una secuencia sonora creada ad hoc pol nomáu músicu. Una escoyeta na que van tar les noveles Lluvia d’agostu y Los xardinos de la lluna, cuentos de l’antoloxía Pasaxeres de la nueche, rellatos premiaos nos concursos de narración curtia de toa Asturies y adelantos d’obres inédites, dialogando con una propuesta musical na que lo mesmo suena un compás aceleráu de les Highlands qu’una añada suavina cola que apaciguar l’espíritu del públicu, enantes de volver a la carga con dalgún de los compases deprendíos por Varela en Lliberdón, La Bandina o La Bonturné. Trátase d’atrapar al públicu, de facelu caer nuna narración adictiva cola esbilla lliteraria que fae Álvarez, la banda sonora que pon Varela y l’ambientación de les imáxenes de fondu, que dirán sucediéndose al mesmu ritmu que la pallabra y la música.
La idea d’amestar la escomanada cultura musical de David Varela a les pallabres de Paco Álvarez ñaz del enfotu por ufrir daqué diferente al Circuitu de les Lletres. La temática de lo que ellí se cuente ye imprevisible: igual podemos tar nuna casa mariñana de la costa asturiana nel sieglu XVI qu’acompañando al míticu anarquista Buenaventura Durruti mentantu comete’l primer gran atracu a un bancu de la hestoria d’España o nuna favela de Río de Janeiro con una sicaria qu’apura los minutos caberos de la so vida. Hestories toes elles con protagonistes que pisen fuerte nel so tiempu y llugar, xente esmolecío por aportar daqué bono a la so realidá. La música que va interpretar el multinstrumentista va salir de la so facienda musical, deprendida de manera autodidacta de mano y con clases maxistrales y milenta conciertos y grabaciones depués. Una llectura dramatizada que puede tener momentos relaxaos y seliquinos, nos que la narración seya pausada y cadenciosa, y otros frenéticos y alloriaos, nos que Álvarez cuspe les pallabres mentantu suena un ritmu infernal de los instrumentos que toca Varela.
Francisco Álvarez nació en Xixón hai mediu sieglu y dende neñu supo que lo suyo yera contar. Marchó a Madrid a estudiar Periodismu y al volver fizo la so carrera como redactor d’un diariu asturianu durante venti años. Pero faltába-y daqué. Dempués d’una curtia esperiencia como editor decidió dar un triple mortal con tirabuzón y afondar la so rellación cola lliteratura. Dende entós vien ganando tolos premios lliterarios qu’hai n’Asturies de narrativa, llarga y curtia, y otros de traducción. Ye’l traductor del italianu que tien la editorial xixonesa Hoja de Lata y col so llabor dos obres de Marcello Fois ganaron el Premiu del Meyor Llibru Italianu asoleyau n’España y el Premiu Llibreter, el que dan les llibreríes de Cataluña, respectivamente. Al tiempu, ta traduciéndose a otres llingües (castellanu y alemán hasta agora) la so novela más nomada.
David Varela tamién ye xixonés, pero d’otru barriu, d’otra dómina, d’otru arte. Dende que llevantó un palmu del suelu lleva venceyáu a la música tradicional asturiana. Tamboriteru, curdionista, músicu d’acompañamientu pa grupos de pop o de teatro, profesor n’escueles de música tradicional, showman… El so nome aparez en mediu centenar de trabayos discográficos, con collaboraciones nacionales ya internacionales en tolos estilos. Trabaya a comuña con diferentes compañíes teatrales y como músicu d’acompañamientu en xires en directu. David Varela ye l’exemplu perfectu de la que tradicional puede furrular perfecto cola modernidá y de manera tresversal coles artes escéniques o la lliteratura».
