La banda gaites de les cuenques mineres, Gaiteros del Carbón, vuelven a facer historia. A primeros d’añu estrenaben nel Teatru José León Delestal de La Felguera esti espectáculu y, tres de vender les entraes en poques hores, tuvieron que facer un segundu pase. El sábadu 9 de xineru repiten nel Teatru de La Llaboral de Xixón la puesta n’escena especial pol so X Aniversariu y volvió a pasar lo mesmo: escosaron l’aforu y tán acabante de poner a la venta les entraes pa un segundu pase; el mesmu día, pero a les 17.30h.
«Una nueva nueche, una nueva versión, artistes invitaos, una puesta n’escena única y un conciertu irrepetible«, son les pallabres coles que Gaiteros del Carbón presentó nes sos redes sociales esti conciertu nuevu que yá tien confirmaes les collaboraciones de Rodrigo Cuevas, Los Berrones, Celtas Cortos, amás de la banda qu’acompañaron a la formación na anterior puesta n’escena: Rubén Bada, Ramón Prada y Juanjo Díaz .
Esta fecha nueva sirve tamién pa poner el ramu a un añu enteru d’actividaes venceyaes al X Aniversariu de Gaiteros del Carbón. A lo llargo de 2026, la formación desendolcó distintes propuestes alredor de la música, la cultura y la memoria del territoriu, con talleres y actividaes musicales, alcuentros y otres iniciatives, ente les que destacó el festival “La Pitanza” nel prau de La Chalana. Nos próximos díes van anunciar les últimes collaboraciones por confirmar pa esta segunda versión de ‘Equí tán… Estos son’.
Suscríbite a les nuestres novedaes
