Uviéu yá tien tola programación de San Mateo, con una presencia mínima del asturianu nella

Namás Rodrigo Cuevas, Pvxarra y Tania Pereira formen parte d'una programación de les fiestes uvieínes con poca presencia del asturianu

Noticies

L’Ayuntamientu d’Uviéu fixo yá pública tola programación musical que, del 10 al 21 del viniente mes de setiembre, va enllenar les cais de la capital asturiana mientres les fiestes de San Mateo. En total, 48 actuaciones repartíes per dellos espacios de la ciudá, de dellos xéneros y pa diversos tipos de públicu. Sicasí, lo que rescampla ye que namás hai 3 actuaciones d’artistes que faen la so carrera musical n’asturianu, un 6% del total.

Rodrigo Cuevas ye’l principal reclamu dientro d’esa curtia selección fecha pol ayuntamientu pa les fiestes uvieínes. L’axitador folclóricu, natural d’Uviéu, va actuar el 21 de setiembre nel Recintu de La Ería dientro de la so xira La Belleza, cola qu’enllenó per dos vegaes el Pabellón de La Madalena d’Avilés. Entá queden entraes pa una actuación que vien causando polémica nos díes últimos.

Les otres dos actuaciones col sellu del asturianu como idioma principal van dase nun espaciu dafechu diferente, como lo ye la céntrica Plaza’l Paragües. Ellí, el 13 de setiembre va ser el turnu de la cantautora Tania Pereira. L’artista tien nel so repertoriu dellos cantares n’asturianu, destacando sobre manera la so última públicación, Rousa de Xericó.

D’otra banda, Pvxarra va ser la otra banda encargada de poner música na Plaza’l Paragües. Eso sí, d’una manera mui diferente a l’anterior actuación. Va ser, tamién, el primer conciertu del tríu na ciudá dende que s’estrenaren el pasáu mes de febreru nel IV Semando Fest, celebráu na Lata de Zinc. L’actuación d’esta banda de xéneros diversos que van dende’l hardcore al rap pasando pela electrónica o’l punk ta marcada pal 15 de setiembre.

Una semana polémica pa la música n’asturianu n’Uviéu

La programación de San Mateo pa esti añu 2026 asoléyase nuna selmana na que saltó la polémica alredor del conciertu de Rodrigo Cuevas enmarcáu nestes feches. Nesta ocasión fueron unes declaraciones del axitador folclóricu, crítiques col actual modelu de les fiestes de San Mateo d’Uviéu les que causaron malestar ente la corporación carbayona, siendo tanto la conceyala de festexos del PP, Covadonga Díaz, como la vocera de Vox, Sonsoles Peralta, quien cargaron contra Cuevas por amosar les sos opiniones enriba d’un escenariu.

Rodrigo Cuevas asoleyó un videucomunicáu n’Instagram reivindicando’l so derechu a la llibertá d’espresión y sorrayando que quier tocar n’Uviéu, porque son les fiestes de la so ciudá.