10 de xineru de 2026. 17.30 hores. Entamaba l’añu pa la música asturiana y facíalo con unes espectatives d’altor énte la doble convocatoria pa esa tarde-nueche en La Felguera. Gaiteros del Carbón diben soplar les veles del so décimu cumpleaños y queríen facelo al estilu d’esa cuenca minera que-yos da identidá y personalidá: en comuña; enllenes de fuercia, arguyu y d’épica; cola memoria colectiva siempre presente y dando tira. Esto último nun lo ficieron namás ente los y les componentes d’esta formación; la solidaridá, el compromisu y la xenerosidá espardióse ente tola xente qu’agotó entraes nel Teatru José Delestal pa los dos pases que diben facese y ente tola escena de la música n’asturianu, gracies a un espectáculu qu’en realidá foi un homenaxe colectivu a los soníos contemporáneos d’esti país.
«Gaiteros del Carbón diben soplar les veles del so décimu cumpleaños y queríen facelo al estilu d’esa cuenca minera que-yos da identidá y personalidá: en comuña; enllenes de fuercia, arguyu y d’épica; cola memoria colectiva siempre presente y dando tira gracies a un espectáculu qu’en realidá foi un homenaxe colectivu a los soníos contemporáneos d’esti país»
Dempués de les coles pa entrar, el hall del teatru llangreanu recibía al públicu con una simulación de madera d’una galería minera dientro de la que podía vese la esposición que Gaiteros del Carbón entamara pa estos actos d’aniversariu. La formación quería estimular los sentíos del públicu y d’esta manera facíalo cola vista. Tamién apeló al olfatu, col golor del fumu qu’había ente les butaques que recordaba al ambiente dientro d’un pozu; y al oyíu, col turullu qu’avisaba de qu’entamaba’l turnu d’estos trabayadores de la música. Asina ye como ente les butaques, a escures y namás cola iluminación de les llámpares de los cascos, Gaiteros del Carbón xubíen a un escenariu nel que diben tar arropaos por Ramón Prada (producción, arreglos, baxu, teclaos, sintetizadores), Rubén Bada (guitarra) y Juanjo Díaz (batería). Tamién polos técnicos Jorge Irazabal (soníu), Pablo Párez (iluminación), Jorge Álvarez (monitores), Javi “Furia” (escenariu); pola rexidora Vanessa Flórez y polos destacadísimos artistes que collaboraron. Un equipu de diez pa un espectáculu sobresaliente en tolos sentíos.
El recital entamó con un clásicu, ‘Santa Bárbara Bendita’ interpretáu a pandereta y con Pablo Carrera, director de la formación, a la gaita. Tres del primer de los samplers -que fueron sonando a lo llargo de tola actuación, cuntando histories de la banda polos sos componentes y faciendo sutiles referencies a los collaboradores-, siguieron homenaxeando a la cuenca del Nalón y tocaron un popurrí de Los Berrones nel que sonó ‘La del estudiante’, ‘Nun yes tú’ y ‘Chacho’, esta última cantada por Irene Álvarez, gaitera del carbón qu’entró nesta formación con cinco años y qu’anguaño tien quince. Cuando dicen que son como una familia, ye por coses como esta.
L’entamu del conciertu foi de los pocos momentos nos que la música tradicional asturiana tuvo presente, yá qu’esti espectáculu tuvo protagonizáu polos cantares compuestos por artistes de la música n’asturianu de 1978 n’adelante. Nesa reivindicación de la tradición entamaron tocando un llixeru con módulo pal baille, como se facía na zona centru-sur d’Asturies na que s’alcuentren les cuenques mineres. Los ximielgos Moisés y Samuel Cuetos, Pablo Carrera -director de gaita- y Arsenio Ruiz -director de percusión- diben alternándose na interpretación d’estos saltones. Les pieces tradicionales continuaron nel siguiente tema, pal que salió’l primer artista convidáu de la nueche: José Ángel Hevia. El míticu gaiteru maliayu interpretó con Gaiteros del Carbón la ‘Marcha’l Carreru’ -que tocaba’l güelu de Carrera nes procesiones- y la ‘Muñeira Casu’. Llueu hubo un momentu pa la tonada y pa l’alcordanza de tola xente que morrió na mina, gracies a que Lucía Fernández -rapaza que tamién lleva 10 años nesta agrupación- cantó ‘Si yo fuera picaor’.
«L’entamu del conciertu foi de los pocos momentos nos que la música tradicional asturiana tuvo presente, yá qu’esti espectáculu tuvo protagonizáu polos cantares compuestos por artistes de la música n’asturianu de 1978 n’adelante»
Marisa Valle Roso foi la siguiente artista n’entrar n’escena. La única muyer, la más moza y con una trayectoria más nueva d’ente tolos artistes convidaos conquistó’l teatru cola fuercia, personalidá y capacidá vocal que la caracteriza. Cantó ‘Nana’, del so discu recién Cenicientes, nuna versión iguada pa gaites y na que Rubén Bada destacó tovía más nos guitarrazos que metió na parte final del tema. Llueu aportó’l protagonismu de les percusiones. Les caxes -una adaptación de les caxes d’alta tensión con menor pesu y un soníu diferente-, los timbales y la batería de Juanjo Díaz xugaron pa calentar l’ambiente con vistes al momentu más reivindicativu de la tarde. Porque Gaiteros del Carbón nun escaecen d’ónde vienen; lleven nel so ADN la conciencia de clase y la llingua d’esti país; y nun hai meyor cantar pa gritar “L’asturianu llingua oficial” que ‘La Danza’ de Dixebra. Colos blincos, glayíos y potencia de Xune Elipe, la enerxía d’esti cantar -que la banda coreografió- resonó pente les butaques al ritmu de los aplausos d’un públicu que diba caleciéndose.
Otru de los grandes gaiteros asturianos, José Manuel Tejedor, foi’l siguiente artista en collaborar pa tocar un par de composiciones de Pablo Carrera, ‘Rumba la fame’ y ‘Estaya 001″. A nivel visual destacaron les llámpares de los cascos mineros de los y les componentes de Gaiteros del Carbón, que diben iluminándose al ritmu la música gracies a un sistema inalámbricu encargáu a costafecha pa esti recital. Precisamente, la iluminación foi una de les coses más orixinales d’esti espectáculu, con una realización impoluta al cargu de Pablo Párez. Musicalmente, qué dicir; el técnicu Jorge Irazabal nun lo tenía fácil, pero foi quien a algamar que les voces y la base instrumental sonaren impecables y que les gaites y percusiones fueren empastando perbién a lo llargo’l conciertu.
«Les llámpares de los cascos mineros de los y les componentes de Gaiteros del Carbón diben iluminándose al ritmu la música gracies a un sistema inalámbricu encargáu a costafecha pa esti recital nel que la iluminación foi una de les coses más orixinales»
Nuberu son los auténticos patriarques de la música contemporánea n’asturianu y son patrimoniu vivu de les cuenques mineres, asina que nun podíen faltar nesta cita. La banda gaites dio-yos tira interpretando un popurrí que recoyía pieces como ‘Dame tira’, ‘La mula torda’ o ‘El chamiceru’, momentu nel que salieron a baillar unes y unos adolescentes alumnes de la escuela llangrena Danzasturias. Llueu fueron Chus Pedro y Manolo Peñayos quienes dieron tira a la formación. Xunto a José Manuel Tejedor y Ramón Prada -responsable de la producción musical d’esta cita que tresmitió continuamente dende l’escenariu ilusión y allegría- interpretaron brillantemente esi himnu llavianés que ye’l ‘Chalaneru’ y compartieron con Gaiteros del Carbón “l’amor por Asturies”, como sorrayó un Chus Pedro que, pesie a tar afectáu de salú y salir recientemente d’una hospitalización, nun quixo dexar de ser parte d’esta celebración colectiva.
L’amistá ye otra de les señes d’identidá de l’agrupación cumpleañera y na banda sonora vital de munches xeneraciones resuenen cantares de Celtas Cortos que nos tresportan a momentos compartíos con collacios y collacies. Por eso el grupu castellanu yeren unos imprescindibles pa esta celebración y emocionaron interpretando ‘Retales de una vida’ que restalló cola épica de les percusiones y les gaites, sacándonos una vegada más la llarimina a quienes sentíemos la guapura y l’arguyu polo qu’entraba pelos nuestros sentíos. Sonaba a despidida, pero faltaba tovía otru de los artistes convidaos; tamién de la cuenca minera, la otra, y ún de los nomes más veteranos y universales de la música asturiana. Víctor Manuel comióse l’escenariu a los sos 78 años pa cantar ‘El Cuélebre’ n’andecha colos Gaiteros del Carbón.
Agora sí. Llegaba’l momentu de zarrar esti primer pase. Un Pablo Carrera mui emocionáu dio les gracies a tola xente que trabayó durante meses pa qu’esta fiesta de cumpleaños seya una realidá y a toles persones que con tanto ciñu sofitaron y sofiten el llabor de la formación. El ‘Santa Bárbara Bendita’ na so versión colectiva con tolos collaboradores y un ‘Asturies Patria Querida’ improvisáu pa dar respuesta a un públicu que nun quería marchar, respigaron y zarraron esta tarde inolvidable a la que tovía-y quedaba otru pase más en malpenes hora y media.
Diez años de constancia, de compromisu, de sentimientu, de trabayu, d’arguyu y d’arrogancia -nel sentíu asturianu de la pallabra- condensaos nun cuidadísimu espectáculu -que pue adaptase a una actuación ensin collaboradores pa poder interpretase más vegaes- qu’homenaxea a cuasi 50 años de música asturiana contemporánea. Que reivindica tolo que nos da una escena sonora que, con conciertos como esti, amuesa otra vegada más el gran momentu que ta viviendo.
Semeyes de Néstor Fernández cedíes por Gaiteros del Carbón
Suscríbite a les nuestres novedaes
