Va unes selmanes LABoral Centru d’Arte y Creación Industrial abrió la so I Convocatoria de Residencies Artístiques (CRA) 2026. Dientro de les distintes llinies y recursos d’esta iniciativa destaca’l LABoratoriu de Soníu, nel que s’ufre un espaciu de 122 metros cuadraos, equipáu con sistema d’altavoces, mesa de mezcles y micrófonos, y que ta pensáu p’acoyer procesos de creación musical, composición sonora, música electrónica, arte sonoru o propuestes qu’amesten música con otres disciplines. El plazu pa presentar solicitúes a traviés de la web de LABoral remata esti vienres 16.
D’ente toles candidatures presentaes, van escoyese un máximu de tres proyectos: dos pa los estudios artísticos y ún pa LABoratoriu de Soníu, lo que supón una oportunidá pa la escena musical asturiana, especialmente pa creadores que trabayen col soníu dende planteamientos contemporáneos, esperimentales o interdisciplinares. Les persones seleccionaes van poder acceder tamién a otros recursos del centru, como’l fabLAB, la biblioteca especializada y la rede de sofitu técnicu y cultural de LABoral.
Na semeya, Andrés Rodrigues durante la so residencia en LABoral.
Suscríbite a les nuestres novedaes
