Tres del so estrenu nel Festival Internacional de Cine de Xixón (FICX) el pasáu payares, vuelve a proyectase en Xixón el documental Generación Xixón Sound. El Paraninfu de La Llaboral va acoyer esti domingu a les 19h y con entrada llibre la emisión d’esta cita filmada por Aure Roces y Médula Producciones. L’eventu ta enmarcáu dientro de Tsudocu, IV Ciclu de Cine Documental Musical y Cultura Urbana qu’entama Tsunami Xixón y nel que va haber otres actividaes.
El Xixón Sound foi un movimientu musical surdíu na primer metá de los años 90. Nomes como Penélope Trip, Manta Ray, Australian Blonde o Kactus Jack foron parte d’esta escena que cantó mayoritariamente n’inglés, anque dellos de los sos protagonistes teníen compromisu y militancia pa cola llingua asturiana. El músicu, director de cine y escritor Ramón Lluis Bande repasó les característiques d’esti movimientu musical nuna obra editada en 1995.
Na película apaecen les y los protagonistes del Xixón Sound y personalidaes venceyaes a la cultura asturiana y el compromisu col asturianu como Alicia Álvarez, Nacho Vegas, Ramón Lluis Bande, Ruma Barbero y David Guardado.
Suscríbite a les nuestres novedaes
