El vienres 3 y sábadu 4 de xunetu Xixón acueye les II Xornaes Músico-Culturales qu’entama la Banda Gaites Conceyu de Xixón cola collaboración de Divertia, la FMCEyUP y Caja Rural de Asturias. Un conciertu de la escuela de gaita y percusión d’esta agrupación, actuaciones, desfiles y alcuentros de bandes de gaites y homenaxes dan forma a la programación d’esti añu.
Les xornaes entamen el vienres 3 a les 19h nel templete de Begoña, onde l’alumnáu de la escuela de gaita y percusión del Conceyu de Xixón va dar un conciertu p’amosar lo que deprendieron a lo llargo del cursu.
El sábadu 4 ye’l día gordu col Alcuentru de Bandes de Gaites Memorial «Pepe Blanco» nel qu’actúen a les 18h al empar la BG Cuélebre de Llugones na Plaza’l Marqués, la BG Xurbeo d’Ayer na Plaza San Miguel, la BG Saxum de Xixón na Plaza’l Náticu y la BG Conceyu de Xixón na Plaza’l Parchís. A esti alcuentru va siguilu un desfile de toles bandes nel paséu de Begoña y un homenaxe a la pareya de gaita y tambor que formaron los músicos finaos Eleuterio Baizán Menéndez y Humerto Baizán del Sol.
Suscríbite a les nuestres novedaes
