Un añu dempués de “L’Aremu”, el primer senciellu del grupu, qu’inclúi dos temes y foi grabáu polos propios músicos nel so llocal d’ensayu, Guieldu tán acabando’l so segundu trabayu, esta vegada yá en los estudios profesionales gozoniegos que dirixe’l músicu y productor Luís Senén. El grupu de música celta repite asina’l mismu formatu anterior, con dos temes, remembrando aquellos “singles” de 45 R.P.M., magar nesti casu nun hai inda edición física y el senciellu va tar namás disponible nes plataformes dixitales.
El primer cantar que-y da títulu al trabayu ye “Perdayuri”, d’autoría propia. La so lletra, n’inglés, ye’l famosu poema “Do not stand at My Grave and Weep” (“Nun pares a llorar na mio tumba” al que Guieldu ta poniendo voz y música col so particular estilu, entemeciendo instrumentos acústicos (violín, ocarina, bouzouki, batería…) y electrónicos (sintetizadores, programaciones…) pa crear esa atmósfera evocadora del celtismu románticu que yá reflexaron nel so trabayu anterior. Esti cantar cunta amás cola collaboración del gaiteru Jesús del Castillo, ún de los ganadores del concursu Runas 2022 del festival de Ortigueira.
El segundu tema ye la “Regueira de los Danzantes”, una pieza instrumental que toma por base la “Danza del Rei Nabucodonosor” qu’en realidá ta compuesta por dellos llazos (partes) caúna con un ritmu. Vien del pueblu de Corporales de Cabrera, una de les contornes de la provincia Llión onde se caltien más vivu l’asturlleonés. Según cunten foi recuperada por Moisés Llébana, gaiteru al que-y tararearon la pieza nun tiempu onde taba a puntu perdese. El títulu «La Regueira de los danzantes» fai referencia a la parte’l pueblu onde los danzantes ensayaben.
Finales de marzu
Guieldu tien pensao asoleyar el nuevu single a finales de marzu, un tiempu que se fai llargu pa los sos fans y qu’ellos despliquen asina: «Les creaciones de Guieldu tán ellaboraes d’una forma daqué complexa, minuciosa y con ciertu sentíu esperimental, intentando curiar cada detalle de la construcción musical, plagada contrastes, y de lo que se ye capaz de tresmitir con ella, prácticamente como una banda sonora cinematográfica. Pa eso, la producción ye necesariamente llarga y desendolcar los numberosos arreglos que componen el nuesu estilu ye una xera que precisa de tiempu ya inspiración pa consiguir que l’oyente se sienta verdaderamente safáu de la realidá ya perciba sentimientos intensos, que ye lo que intentamos».
Amás, despliquen qu’esti trabayu «xira alredor del conceutu de la trescendencia l’espíritu, afondando nel significáu que describen les llínies del poema, emponderando la guapura y l’equilibriu de la naturaleza como’l llugar del que tou naz y al que se torna a la fin de la vida».
Suscríbite a les nuestres novedaes
