El 8M d’esti añu yá tien banda sonora, qu’amás ye participativa

Esti añu la movilización del 8 de Marzu, Día Internacional de la Muyer Trabayadora, va aportar con muncho protagonismu de la cultura y la identidá asturiana. Esto yá rescamplaba tanto nel llema emplegáu ,”Compañera, Dame Tira” -espresión orixinaria del mundu de la mina qu’espardió Nuberu con un cantar del mesmu nome-, como nel cartelu -nel qu’apaez una muyer vistida col traxe’l país-, y agora’l movimientu feminista da un pasu más cola publicación del cantar de la movilización.

“Compañera, Dame Tira” ye una adaptación de la Jota de Val.lebréu con una lletra qu’invita a dar tira con sororidá. L’himnu naz a iniciativa del colectivu Brigada Feminista, con collaboración d’Asturies Feminista 8M, «sal de la cuenca minera a tol territoriu pa facer un llamamientu a la manifestación del 8 de marzu en Mieres, convocada de forma unitaria por Asturies 8M», y surde gracies al sofitu de la Escuela de Música Tradicional de Mieres «que fixo posible grabar esta canción», como apunten dende’l colectivu.

Amás, Brigada Feminista llamen a «dar tira col estribillu» y por eso conviden a artistes y persones a participar grabando un videu nel qu’interpreten l’estribillu y a compartilo en redes sociales col hashtag #compañeradametira. Ye un exemplu más del poder que tien la música pa crear conciencia, unión y solidaridá ente les persones.