Herbamora interpreta n’asturianu l’himnu feminista “I Tu, Sols Tu” del grupu valencianu El Diluvi
Va 3 años asoleyaba’l videoclip de “Tu, namás tu“, la versión n’asturianu qu’Herbamora faen de “I Tu, Sols Tu“, popular cantar de la banda valenciana fusión El Diluvi. Nesti Día Internacional pa la Eliminación de la Violencia contra la Muyer, recuperamos esti tema y facemos un llamamientu a participar nes movilizaciones convocaes pol movimientu feminista d’Asturies.
“I tu sols tu” ye un cantar inspiráu nun poema de Maria Mercè Marçal que dicía: “A l’azar agradézo-y trés coses: nacer muyer, de clase baxa y nación oprimida. Y al turbiu azul, ser trés vegaes rebelde”. Ye por esta conciencia feminista, de clase y de solidaridá ente los pueblos, por la qu’El Diluvi pidieron a grupos que canten en distintes llingües de la Península Ibérica, que ficieran una versión nel so idioma propiu.
N’Asturies la versión ye del grupu de pandereteres Herbamora con una lletra tornada por Fernando Álvarez-Balbuena y que da como resultáu esti “Tu namás tú”. Amás, nel videoclip tamién apaecen imáxenes d’una movilización feminista en Xixón, ente otres munches de tol mundu.
