Herbamora van regalar a tolos siguidores de la música asturiana l’adelantu del so esperáu tercer discu. «Lluna de collecha» ye’l nome del single de 286 Llunes, trabayu que van asoleyar a finales d’esti mes. La formación integrada por Elena Rodríguez Martínez, María Gavieiro Álvarez. Paula Cristóbal Caso, Natalia Nuño Rodríguez y María Vázquez Álvarez va estrenar el single na canal de YouTube de musicasturiana.com a les 21h. Al día siguiente, va tar disponible en toles plataformes dixitales.
«Lluna de collecha» ye una composición de Ruth Suárez sobre una siega de Riballagu (Senabria), una mirada a la vida d’antaño, «onde’l trabayu de les muyeres yera mui pocu valoráu», como comenten Herbamora. «Con tou y con eso, la siega yera una fiesta, un motivu de cortexu, d’alcuentros y aprendizaxes, polo que pa nós presentar esti tema ye pensar nel nuestru raigañu, na nuestra semiente, nes nuestres güeles y más, que fueron y van ser los nuestros referentes», despliquen. Con esti single, Herbamora amiesta electrónica y trabayu vocal, una torna al camín qu’abrieron con ¡Sali, L.luna! (2007, L’Aguañaz), actualizando la sonoridá al 2024.
Suscríbite a les nuestres novedaes
