La tienda de Puru Remangu n’Uviéu acoyó esti vienres pasáu la presentación de 286 llunes, el nuevu álbum d’Herbamora. Les cinco pandereteres firmaron exemplares del discu en físicu y dedicaron unes pallabres a les persones asistentes precedíes de Xicu Ariza, director de musicasturiana.com, que destacó la trayectoria del grupu como pioneres de la revolución de la pandereta. Les primeres pallabres d’Herbamora foron de Paula Cristóbal, qu’agradeció l’acoyida del discu. Tres ella, María Gavieiro lleó’l testu qu’elles mesmes escribieron pal llibretu del CD, que faen referencia al «calderón» d’estos 11 años dende’l so últimu trabayu, N’Acústicu: «286 llunes pretende romper esti silenciu pa facer homenaxe a la memoria y saberes de les güeles que nos tresmitieron la música y el baille p’alcontranos, hermananos, reatopanos cola humanidá, como una forma de facer pueblu. Nós, inevitablemente, sentímonos filu conductor ente esa memoria oral de la que somos nietes y el mundu que queremos pa les que vienen tres de nós». Dempués d’una amuesa de la so música con un son d’arriba pandeiros en manes y un cachín de ‘Lluna de sangre’, tol mundu salió del llocal pa danzar la ‘Yerbabuena‘ na cai.
Suscríbite a les nuestres novedaes
