Esti vienres 29 de payares va ver la lluz l’esperáu tercer trabayu d’Herbamora: 286 Llunes. Tres d’estrenar la selmana pasada’l primer single -‘Lluna de collecha‘-, el quintetu de pandereteres anuncia novedaes: desvela la portada y va facer un actu de presentación el mesmu vienres na tienda de Puru Remangu d’Uviéu -na que tamién tien un espaciu Musicasturiana.com-. Na presentación van falar del EP, vender los primeros exemplares y facer una firma de discos ente tola xente que tea interesao. L’actividá va entamar a les 19h y la entrada ye llibre.
Herbamora ye ún de los grupos folk más representativos de la música asturiana, formáu por cinco muyeres percusionistes y cantantes venceyaes a la cultura tradicional. Depués de 11 años de parón discográficu, tornen con un trabayu enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes. Una amuesta d’ello ye «Lluna de collecha«, una composición de Ruth Suárez sobre una siega de Riballagu (Senabria) con una lletra tradicional que «fala del desencuentru, del desamor». «Reconocelo y abrazalo como sentimientos humanos de los qu’aprender pue entendese tamién como collecha: la integración d’aprendizaxes», apunten les componentes del grupu.
Suscríbite a les nuestres novedaes
