Marihuana, tonada y folk axúntense nun cantar de Mota Blues

Mota Blues ye ún de los grupos más provocadores, divertíos y orixinales de escena musical d’Asturies. Lleven yá 13 años pisando escenarios, publicaron tres discos de llarga duración y dellos singles y agora tán trabayando nun cuartu álbum nel que van facer dalgo inéditu hasta’l momentu: entemecer blues, folk, asturianada, tabacu y marihuana nun mesmu cantar que va asoleyar en marzu: ‘Nicotacum‘.

Tres d’esta macarrada marca de la casa Mota Blues alcuéntrense sobre manera Chino el Indio, cabezaleru d’esti proyectu, y Nel de Purnea. Xuntos compusieron y fixeron la producción d’esta pieza que grabó dafechu Purnea nel so estudiu. Pero como Mota Blues ye, en palabres de Chino, «un núcleu de músicos amigos que vamos collaborando depende de cada situación», arrodiáronse pa la ocasión del cantador de tonada Carlos Velasco, del gaiteru Rubén Alba y del percusionista Juanjo Díaz.

«Nunca se metió nada asemeyáu a l’asturianada nun discu de Mota y como yo toi tocando con Carlinos, comenté-y que nos entone un ‘marihuana’ guapu, guapu«, diz ente rises l’Indio sobre esti cantar que «entama falando del tabacu, pero como les coses tienen que dir siempre a meyor, deriva nel cannabis». Musicalmente ye’l tema más folk que va tener Fumetamorfosis, el discu que’l grupu va llanzar pa la primavera y nel que van sonar estilos como’l rock, la ranchera, el rap y la electrónica.

Al estilu de los bluesman
«Siempre hubo un elementu folk en Mota Blues, porque’l country nun dexa de ser folk«, desplica Chino el Indio, anque nesta ocasión van dir un pasu más allá que n’otros cantares que menta como ‘Vais a morrer’ o ‘Vivo de lo que atropello’. Llingüísticamente ‘Nicotacum’ va tar n’amestáu, forma d’espresión que’l músicu defende por naturalidá y influencia de los bluesman clásicos: «Yo trato de cantar como falo, que ye n’amestáu. Muddy Waters y Howlin Wolf son músicos blues qu’enxamás falaron nel inglés de la BBC, entós pa mi ye un error querer falar nel rock como académicu, cuando en realidá ye una música de cai y de trabayadores».

Nel Instagram de Mota Blues pueden vese unos videos adelantu d’esti ‘Nicotacum’ enantes de que salga nun par de meses y tamién hai dellos singles en Spotify que van tar dientro de Fumetamorfosis, un discu nel qu’amás collaboren otros artistes d’Asturies como’l multiinstrumentista Pablo Canalís o Leticia Fuegos na estaya audiovisual.