El tenor cangués Joaquín Pixán asoleyó recientemente’l videoclip «Canto a Cangas» -dirixíu por Benito Sierra González-, la so nueva composición dedicada al conceyu que lu vio medrar. El testu, escritu por él mesmu xunto a Alfonso S. Lorenzo, ye un homenaxe a les ayalgues del territoriu de Cangas del Narcea, ensin escaecer les fiestes del Carmen cola so tradicional Descarga. El doctor en Musicoloxía y multi-instrumentista Luis Álvarez Pola y Javier Vázquez -músicu asturianu afincáu n’Alemania- ficieron les trescriciones y arreglos instrumentales de la pieza, na que tamién participaron les voces del Coro de solistas de Madrid.
Joaquín Pixan ye’l tenor líricu con más trayectoria de la música asturiana. En 1963, con namás 13 años, ganó’l so primer concursu en Radio España de Madrid y a los 16 entamaría la so formación académica artística. Trabayó con milenta orquestes, directores y cantantes renomaos de tol mundu, y actuó nuna montonera países. Tien 36 trabayos publicaos y nellos destaca’l so compromisu cola canción asturiana, incorporando al so repertoriu pieces populares qu’interpreta dende la perspectiva de la música académica. Exemplu d’ello ye la grabación en direuto del conciertu homenaxe a José González «El Presi» xunto al pianista J. Ángel Arévalo, d’agostu de 2003. Amás, en 2006 cantó a poetes asturianes como Berta Piñán, Taresa Lorences y Esther Prieto nel discu Palabres de Muyer, con composiciones de Ramón Prada y Jorge Muñiz.
Suscríbite a les nuestres novedaes
