Dende esta selmana yá tán disponibles en plataformes musicales el segundu discu de La Bandina, …de romandela (2005), y l’únicu trabayu publicáu de Boides, Asturies: Camín de Compostela (1993), editaos pol sellu Fono Astur. Dambes grabaciones tamién pueden mercase na tienda de musicasturiana.com.
Santi Caleya a la gaita y el saxofón, les percusiones de Pablo Pumarada, Merce Santos cola zanfona y el curdionista David Varela formaben el grupu La Bandina, una formación imprescindible del folk asturianu. Tres años dempués del so primer discu ¡Pa Bail.lar! (2002) dedicáu a la música pal baille, asoleyaron esti segundu trabayu: …de romandela (2005). Nél pueden sentise, amás del míticu «Na Caleya» y les sos igües de cantares tradicionales asturianos, música bretona, francesa y macedonia. Nel álbum collaboren músicos como’l percusionista Antón Barquero, el baxista Luis Rodríguez, Anabel Santiago y Xuan d’Amandi coles sos voces, el trombonista Marcos Malnero y María Vázquez -percusión tradicional-.
En 1993, Boides -José Ángel Hevia, Xuan Nel Expósito, Daniel Lombas, Javier Rojo y Joaquín D. Menéndez- asoleyaron, coincidiendo cola celebración del Xacobeo, el discu Asturies: Camín de Compostela, un percorríu musical peles dos rutes asturianes del Camín de Santiago, la del interior y la de la costa. El grupu amiesta nesti trabayu composiciones propies basaes en melodíes populares con tonaes como Tengo de subir al puertu y Carretera d’Avilés, y dances.
Cola dixitalización d’estos dos trabayos, musicasturiana.com sigue avanzando nel so envís de faer más accesible la música asturiana per tol mundu.
Merca los discos de La Bandina y Boides
Suscríbite a les nuestres novedaes
