El tenor cangués Joaquín Pixán ta acabante d’asoleyar Asturianadas. La memoria de nuestros mayores. Trátase d’un CD formáu por diez composiciones nueves sobre testos d’encargu a poetes actuales como Ángel Fierro, Aurelio González Ovies y el propiu Joaquín. Recupera, amás, poemes referenciales d’Aurelio de Llano, Vicente Rodríguez y Juan Martínez Abades, tooos ellos venceyaos a la cultura asturiana. Nél acompañen Manuel Pachecho y Aida Suárez al pianu, Martín Pérez a la flauta, Nel Pérez al clarinete, Maribel G. Morán a la voz y Iñaki Santianes a la gaita.
El trabayu presentóse esti martes 17 na Colexata de San Xuan Bautista de Xixón nun actu nel qu’intervino’l presidente cántabru, Miguel Ángel Revilla, y nel que tuvo presente’l presidente asturianu, Adrián Barbón. Na so intervención Pixán reivindicó la importancia de caltener los raigaños. Precisamente, «la necesidá de caltener el llegáu musical tradicional del sur d’Asturies y el norte de Lleón, esta tierra que tien la so espresión cultural nes llamaes ‘canciones de la Raya’», ye lo que llevó al tener a grabar esti discu, según recueye’l so testu de presentación.
«A partir de la inspiración d’eses asturianaes tradicionales, Joaquín Pixán compón esti cancioneru qu’aspira a xubir al escenariu, ensin escaecer, d’ónde vien y teniendo un oxetivu mui claro: crear innovando dende la tradición, nesti casu y por razones personales, anclada na cuenca del Narcea», conclúi’l testu qu’apaez nel llibretu d’esti discu que yá pue mercase por 15 €.
Suscríbite a les nuestres novedaes
