«Fai unos años, nel día de Navidá, pela tarde facíase en Cuideiru una xuntanza de villancicos pixuatos onde quedábemos unos cuantos y esti villancicu yá lo grabara Llan de Cubel nel añu 92, nel discu de Na Llende«. Con estes pallabres resume’l guitarrista Rubén Bada l’orixe del villancicu que L-R acaba d’asoleyar na so cuenta d’Instagram. La pieza vien acompaña d’una obra audiovisual fecha pola panderetera, cantante y artista visual, Leticia Baselgas. Sicasí, como ellos maticen «nin la estética se cuerresponde coles feches y intentamos facelo personal», amosando asina la so «filosofía de vida» construyía dende’l post-folk.
Nun ye la primer vez que L-R publiquen esti cantar, yá que durante l‘andanciu publicaren tamién una versión acústica cola participación «d’una montonera xente pa recrear la idega de la comunidá que se xuntaba pa cantar villancicos», desplica Leticia Baselgas. Sicasí, l’añu pasáu grabaron «en casa, en plan guerrilla» una versión post-folk con tola so personalidá ,que ye lo qu’agora ve la lluz y colo qu’esti dúu desea una bona nueche a tol mundu.
Suscríbite a les nuestres novedaes
