Tres d’asoleyar el branu pasáu el so tercer discu, Resollu, la Banda Gaites Llacín sigue presentando en directo esti espectáculu qu’axunta a más de cien músicos y bailladores enriba l’escenariu. La próxima cita ye esti sábadu 10 d’ochobre a les 21.30h en La Talá de Llanes, dientro de dla programación de La Seronda en Llanes organizada pol Conceyu llaniscu. Dempués d’ellos, la nueche sigue con música folk gracies a l’actuación del tríu de folk de cámara Llau.
Con Resollu la formación del conceyu llaniscu pon n’escena a una montonera d’artistes que formen parte del so últimu trabayu discográficu. Son delles les ocasiones nes que se punxo n’escena esti espectáculu, destacando la presentación del mesmu en La Portiella, la cita n’Arenas de Cabrales o’l conciertu de clausura de Les Xornaes de la Música tradicional Asturiana celebráu nel Teatru de la Universidá Llaboral de Xixón; una actuación que foi grabada por TPA pa la so posterior emisión especial como Conciertu d’Añu Nuevu 2026.
Esti apueste musical amuesa una clara evolución nel camín entamáu nos dos discos anteriores, con un conceptu que trata de poner un pie na tradición y otru na modernidá y la creatividá musical, al traviés de distintos estilos que tomen como puntu de partida la música tradicional y folk.
El conciertu pon n’escena’l trabayu de sesenta de los componentes de la Banda Llacín xuntu con una trentena de músicos y danzantes, en bona parte collaboradores participantes na grabación d’esti discu, ente los que destaquen los componentes del grupu folk Felpeyu: Lisardo Prieto (violín), Ruma Barbero (bodhram), Diego Pangua (flauta trevesera), Luis Nicolás (guitarra), Aníbal Menchaca (baxu) y Alberto Ablanedo (bouzouki).
A ellos súmense integrantes d’otres formaciones destacaes del panorama folk asturianu como Dani Álvarez (flauta travesera), Julio Rodríguez (bouzouki), Pepín de Muñalén (flauta trevesera), Xuan Nel Expósito y Txema Pires (acordión). El resultáu conceptual d’esti trabayu musical compleméntase cola participación de los teclaos de Richard García, los vientos de Miguel Herrero (trompeta), Kiko Flores, Fausto Salvent (saxo), Leo Pousa (trombón) y la batería y el baxu d’Israel Sánchez, Guille Barrera y Sergio Rodríguez. La guinda del conciertu poner les participaciones de les voces de Xosé Antón «Ambás» y Lluci Palomares, amás de les collaboraciones del Grupu Etnográficu l’Oriente-Llacín.
Trátase de 100 minutos de música en directo que ponen n’escena’l trabayu discográficu Resollu, con un repertoriu variáu de 15 temes que van partir de la mesma esencia tradicional y folk, al traviés d’un viaxe per dellos estilos nos que tamién s’interpreten composiciones tanto propies, como otres d’artistes de la redolada musical nacional y internacional.
Esti conciertu y el mesmu discu tomen el so nome del fenómenu natural de los bufones, bien característicu nel conceyu llaniscu. L’efectu d’erosión de la mar na roca caliar da llugar a resquiebres y chimenees que conecten la mar cola tierra. El golpe del agua contra los cantiles provoca la espulsión del aire nes galeríes, escapando al esterior con chorros a gran presión. Esa espulsión fuerte d’aire tien por nome «Resollu», y esa semeyanza cola fuercia de les gaites, les percusiones y los vientos metales, esprésala Llacín na so tercer publicación. cantábrica.
Resollu supón un pasu más palantre na trayectoria de causi trenta años de la Banda Gaites LLacín que baxo la dirección de los sos fundadores y directores Vítor Carbajal y Nuria Tarodo, cunta con trés trabayos discográficos: Tornallás, Xideces y Resollu, que marquen un estilu propiu dientro de les formaciones d’esti calter.
Suscríbite a les nuestres novedaes
