El 27 de xunu sal a la venta Resollu, el discu nuevu de la Banda Gaites Llacín dempués de 17 años desque publicaren l’anterior trabayu. Una selmana dempués, el vienres 4 de xunetu, l’agrupación va presentalo en directo en La Vega La Portilla (Llanes) nun conciertu perespecial nel que van participar los sesenta componentes d’esta formación xunto con una trentena de músicos y danzantes ente los que s’inclúin dalgunos de los nomes más destacaos del folk asturianu. A les 22h y con entrada de baldre ye esta cita na que tamién van tocar Felpeyu y Baxel.
El conciertu de la Banda Gaites Llacín van tar caracterizáu por 100 minutos de música en directo nos que van sonar «14 temes que parten de la esencia tradicional y folk y viaxen per dellos estilos dientro de los que tamién van sonar composiciones propies y tamién d’otros artistes de la música nacional y internacional», como despliquen dende’l Ayuntamientu de Llanes, institución que patrocina, sofita y organiza esta cita xunto cola propia agrupación tradicional.
Ente los nomes que van xubir al escenariu alcuéntrense bona parte de los collaboradores na grabación del propiu Resollu. Los componentes de Felpeyu Lisardo Prieto (violín), Ruma Barbero (bodhram), Diego Pangua (flauta travesera), Luis Nicolás (guitarra), Aníbal Menchaca (bajo) y Alberto Ablanedo (bouzouki); otros destacaos instrumentistes del folk asturianu Dani Álvarez (flauta travesera), Julio Rodríguez (bouzouki) y Pepín de Muñalén (flauta travesera); amás d’otros músicos como Richard García (teclaos), Miguel Herrero (trompeta), Kiko Flores (saxu), Leo Pousa (trombón), Israel Sánchez (batería) y Sergio Rodríguez (baxu). A ellos súmense tamién les voces de Xosé Antón ‘Ambás’, Lluci G. Palomares y les collaboraciones de Mónica Delgado y el Grupu Etnográficu l’Oriente, ente otros artistes.
Resollu garra’l so nome del fenómenu natural que se da ente la roca y la mar provocando «la espulsión del aire en galeríes, escapando al esterior chorros d’agua de gran presión; una similitú cola fuercia de les gaites, les percusiones y los vientos metales», como desplica Vítor Carbajal, director de la Banda Gaites Llacín xunto a Nuria Tarodo. L’álbum ta formáu por doce temes que ponen «un pie na tradición y otru na modernidá, busquen un soníu más potente de la banda y añaden propuestes sonores nueves que ruempen con tolo anterior».
Tres d’asoleyar hai unes selmanes el primer adelantu ‘Resollu’, l’agrupación llanisca va llanzar esti vienres el so single nuevu: ‘Camín de Glasgow’. El trabayu tamién ta disponible en preventa en Musicasturiana.com, onde la xente pue actualu pa recibilu’l mesmu día del llanzamientu en CD y tamién en CD y tamién en vinilu, siendo la primer vez en décades que s’edita un discu de gaita asturiana nesti formatu últimu, faciendo d’él cuasique una pieza de coleccionista.
D’esta manera, l’agrupación sigue dando los pasos que definen a una banda creada en 1998 nel conceyu Llanes pente los escolinos de la Escuela de Música Tradicional. Nesti tiempu xiró per países como China o Estaos Xuníos; actuó nos principales festivales del xéneru y algamó reconocimientos y premios. El repertoriu qu’executa fai un viaxe pel patrimoniu musical asturianu dende los vieyos temes tradicionales a los más actuales, pasando per composiciones propies y, en delles ocasiones, fusiones musicales con pieces de los paises que formen l’Arcu Atlánticu. Nel so tercer discu, Resollu, van afondar nesti llabor qu’abrieron discográficamente con Tornallás (2002) y Xideces (2008).
Suscríbite a les nuestres novedaes
