Dempués de seis temporaes, 30 grabaciones y más de 360.000 reproducciones en YouTube, Amosando fai un puntu y aparte. El ciclu de presentaciones de novedaes discográfiques impulsáu por musicasturiana.com nun va tener otra edición en 2025 y, con vistes a 2026, la intención ye la d’anovar el formatu y l’espaciu de grabación. D’esta manera, ayeri la bandina astur-bretona La Banda Latira y el tríu de folk de cámara La Bedur amosaron les sos novedaes discográfiques y, amás, despidíense de Les Naves d’El Natahoyo, llocal xixonés qu’acoyó la mayoría de los conciertos-grabaciones d’Amosando.
A les 16h de la tarde entamó La Banda Latira, el quintetu formáu polos bretones Floriane Legros y Nicolas Radin, y los asturianos Diego C. Camiña, Rodrigo Joglar y Marta González . Interpretaron cuatro temes del so nuevu discu enllenos de tradición astur-bretona, mestura d’estilos y fuercia tanto no musical como no estético.
Per otru llau, el tríu de música tradicional contemporánea La Bedur presentó cuatro temes del so próximu primer trabayu que van asoleyar el 29 de setiembre. Rodrigo Roces (tecláu), Pepín de Muñalén (vigulín) y Miguel R. Monteavaro (flauta) formen esti grupu que tien una instrumentación orixinal dientro del xéneru, con un soníu nel que tienen munchu protagonismu los ritmos pal baille y les posibilidaes técniques de cada instrumentu,
El públicu asistente pudo disfrutar d’un conciertu especial, nel que se llendó l’aforu a una docena de persones y nun espaciu bien distintu y underground como son Les Naves d’El Natahoyo.
Seis ediciones y 30 artistes
Amosando nació en marzu de 2019 a idea de la plataforma musicasturiana.com y hasta esti 2024 foi celebrándose ininterrumpidamente. Hasta agora yá tocaron y se publicaron los videos de 28 artistes que presentaron les sos novedaes discográfiques: L-R, Xaime Martínez, Ún de Grao, D’Urria, Anabel Santiago, Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera, José Manuel Tejedor, Llevólu’l Sumiciu, Fernando Valle Roso y Silvia Moreno, Toli Morilla, Caldo y Os Rabizos Baxel, Algaire, Mostru L’Horru, Slum Suit, La Garrapiella, La Bonturné, Antón Menchaca, 6 Riales, Mapi Quintana y Melandru. La suma de los videos de los conciertos algama más de 360.000 reproducciones en YouTube. Nos dos próximos meses van publicase los videos de La Bedur y La Banda Latira, zarrándose asina esta primer etapa d’Amosando con un total de 30 actuaciones a lo llargo de seis temporaes.
Estos conciertos amuesen la calidá de la música fecha en llingua asturiana amás de la so variedá, yá qu’estilos como’l pop, indie, electrónica, folk, tonada, canción d’autor, rap, jazz y rock suenen nesta iniciativa producida por Ixuxú Cultura, realizada audiovisualmente por Javi Lueje y Rubén Álvarez y subvencionada pola Conseyería de Cultura, Política Llingüística y Deporte del Principáu d’Asturies.
Suscríbite a les nuestres novedaes
