Dende esta selmana yá tán disponibles na tienda de Musicasturiana.com dos discos de Gatos del Fornu –Gatos del Fornu (2003) y Na Cai (2008)-, el recopilatoriu Cantares de Sidra y Chigre (1996), y la Suite Mitolóxica Asturiana (1996) de Jorge Méndez, editaos pol sellu Fono Astur.
Gatos del Fornu foi un grupu folk formáu por Guillermo Pérez a la gaita, el curdioneru Miguel Ángel Fernández, la clarinetista Lorena García, Daniel Díez a la guitarra, Raúl Alonso y Moisés Cortina a les percusiones, y les voces d’Ana María Noriega y Rosa Ferreira. Entamó la so andadura en 1996, dexando dos grabaciones: Gatos del Fornu (2003) y Na Cai (2008), amás de la so participación nel compilatoriu Xeneración Folk (2000). Nel so primer discu pueden alcontrase les sos versiones de cantares y melodíes tradicionales -«Cantar de boda», «Xota n’Ibias», «Les cebolles rellenes»-, y composiciones propies -«La Fontona», «El Lloberu»-. Tamién collaboren destacaos músicos de la escena asturiana: Indalecio Santos, Alberto Ablanedo, Ígor Medio y Horacio García.
En 2001, Gatos del Fornu asoleyen Na Cai con una formación anovada; al núcleu de Miguel Ángel Fernández, Guillermo Pérez, Daniel Díez, Raúl Alonso y Moisés Cortina se-yos incorpora Silvia Quesada -voz solista y penderetes-, Rubén Bueno -flauta y whistles-, Moisés Álvarez -bouzouki-, y Luis Senén Fernández -baxu-. Herbamora, la Banda Gaites Xiranda, Diego C. Camiña, Pelayo García y Jim Sutherland collaboren nel discu. Na mesma llinia de la so anterior grabación, pueden sentise melodíes tradicionales pal baille como la «Saldiguera» o la «Xota Xedré», y composiciones como «Mar».
Per otru llau, Cantares de Sidra y Chigre (1996) ye un recopilatoriu de temes al rodiu la cultura de la sidra, que vio la lluz nel añu de la inauguración del Muséu de la Sidra d’Asturies. Nél pueden topase pieces corales interpretaes pol Coro Santiaguín y Aires de Candás, tonada cantada por Mariluz Cristóbal Caunedo, Ismael Tomás Montes y Jorge Tuya, melodíes de gaita, poesía y otres composiciones.
La última d’estes incorporaciones al catálogu ye la de Jorge Méndez. Grabó en 1996 la so composición Suite Mitolóxica Asturiana pa órganu, qu’entama con «La Nuechi de San Xuan» y sigue con seis partes dedicaes a los personaxes mitolóxicos: la güestia, el nuberu, el cuélebre, les bruxes, les xanes y el trasgu. El músicu emplega los rexistros del órganu pa representar y caracterizar cada personaxe al traviés de melodíes de sonoridá celta.
Merca los discos
Suscríbite a les nuestres novedaes
