La Banda Sonora d’Alicia Álvarez
Alicia Álvarez (Xixón, 1979) ye una de les muyeres clave na música contemporánea fecha n’Asturies. Entamó tocando n’Undershakers en 1994 -cuando tovía había mui poques muyeres en grupos pop y rock-, pa llueu fundar cola so hermana Mar Pauline en la Playa, banda cola que sigue n’activo y cola qu’algamó muncha sonadía na escena indie-pop asturiana y estatal. Tamién periodista y escritora, dende l’añu 2016 vencéyase a la escena de la música n’asturianu gracies a la publicación del so llibru-discu Pulgarina y a la edición col sellu La Fabriquina de los compilatorios de música pa la reciella Bestiariu. Kikirikikí ye la so última obra, publicada en 2020, interpretada n’asturianu dafechu y que ta presentando n’escenarios de tol país.
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora d’Alicia Álvarez
Un discu qu’enxamás canses de sentir.
Let England Shake, de PJ Harvey. Ye ún de los discos que más veces sentí y que siempre m’espierta munches emociones. Ta enllenu de señardá, que ye un sentimientu que m’encanta na música. Tola discografía de PJ Harvey paezme una xenialidá, pero esti discu ye, pa min, lo meyor que compuso nunca.
Si tuvieres que formar parte d’otru proyectu musical, ¿cuál sería?
Casi quiero más ser siguidora o públicu d’otros proyectos musicales y quedar colos mios, qu’ehí déxenme mandar un poco, jajajaja.
De los cantares que compusisti o interpretes, ¿cuál ye’l to preferíu?
Eso ye mui difícil de contestar porque les canciones tienen siempre un venceyu colo emocional, asina que por una cosa o otra toes suelen ser importantes, pero si hai qu’escoyer, pues de los temes pa la reciella “Kikirikikí” ye una de las canciones de les que toi más arguyosa como composición y tamién ye mui especial no personal. De Pauline en la Playa, pues aparte de “Titubeas”, que ye “la nuestra” canción, “Quien lo iba a decir”, que ye un cantu al amor feliz que siempre m’emociona muncho.
«Una de les coses imprescindibles en política cultural nel casu d’Asturies ye modificar la llei d’espectáculos pa garantizar la música en directo»
¿Cuándo foi la primer vez que xubisti a un escenariu y que pasó enantes, durante y depués?
Pues a un escenariu como tal supongo que xubí en Quiquilimon, na sala que tenía la compañía nos 80 y 90 na cai Pedro Duro de Xixón. Yo diba ellí tolos fines de selmana a la escuela de teatru. Foi una esperiencia mui collaborativa y creativa. Recuérdolo como daqué mui especial qu’a la mio hermana Mar y a min diba marcanos muncho pa como díbemos trabayar después. El primer escenariu musical foi nun bar en Muros del Nalon, el Peix, que foi onde Undershakers dimos oficialmente’l nuestru primer conciertu con Babylon Chat en 1994. Foi divertidísimo. Tanto como pa querer siguir repitiendo veintipico años dempués, que ye lo que dura yá esto.
¿Qué ye lo más inxusto de ser artista?
Nun poder ser namás artista.
Si fueres Conseyera de Cultura, ¿qué son les primeres coses que fadríes?
Aconceyar con tolos axentes del sector pa conocer les necesidaes reales y diseñar con ellos un plan d’acción que dea estabilidá, llegalidá y continuidá a los trabayadores de la cultura. Dende una conseyería nun se pueden resolver cuestiones como autónomos y demás, que condicionen abondo’l trabayu de los artistes, pero sí se pue crear, por exemplu, redes pa que los grupos de música tengan circuitos estables pa tocar. Redes que pueden ser collaboración de lo público y lo privao, non solo nos espacios públicos como ye agora Cultura en Rede. Pero que nun seya daqué puntual o efímero. Asturies nun ye namás Xixón y Uviéu. Asturies ye una comunidá pergrande que permitiría un bon circuitu más allá de ciclos sueltos o convocatories aisllaes. Otra de les coses imprescindibles nel casu d’Asturies ye modificar la llei d’espectáculos pa garantizar la música en directo. Per ehí entamaría.
«Si ficiera la banda sonora de ‘Lluvia d’agostu‘ fadría un rollu tipu’l de PJ Harvey que creo que-y diría mui bien»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Nel mio casu nun foi nengún artista en particular, sinón les canciones que compusi pa Bestiariu, la colección de discos pa tola familia qu’editamos dende La Fabriquina. Nesi casu la premisa yera que fueren temes sobre animalinos y n’asturianu. Yo compusi un tema pa cada discu, amás del tema que compusimos Pauline en la Playa, y cuando vi’l resultáu, gustóme tanto que tuvi gana de siguir esplorando per ehí. Depués yá vendría Pulgarina, el “Préstame Pola vida” pal Dia de la Reciella y finalmente Kikirikikí.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Yo soi mui abierta pa la música. A min interésame casi tolo qu’escucho, que nun significa que me preste too nin muncho menos, pero sí que tengo una bona predisposición a sentir coses diferentes a los mios gustos. Nun hai nada inconfesable.
¿A qué personaxe públicu convidaríes a un conciertu tuyu, a pasar llueu pel backstage y pa qué?
Yo nun tengo mui exaltáu’l rollu fan pero a min gustaríame que viniera un conciertu nuestru Kristin Hersh, qu’a min ye la música que más m’inspiró y un referente d’independencia. Una vez tuvi la oportunidá de dici-ylo y agradece-y la so música, porque pa min foi como descubrir una puerta nueva per onde podíen transitar les composiciones.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Pues de Lluvia d’agostu (Hoja de Lata) o Los Xardinos de la lluna (Trabe), de Paco Álvarez. El qu’él quixera, porque nun pueden tar meyor escritos. Gustáronme munchísimo los dos. Si fuera’l de Durruti, fadría un rollu tipu’l de PJ Harvey que creo que-y diría mui bien.
Asina fala Alicia Álvarez de los cantares qu’escoyó pa la so playlist
1. Kristin Hersh – Your ghost (Hips and Makers, 1994)
Cuando sentí esta canción yo namás tenía 16 años. Tovía güei m’acuerdo de la sensación. Sentí que taba escuchando daqué único, un soníu, una formar de cantar y tocar que nunca sintiera hasta esi momentu. Pa min cambiólo too.
2. PJ Harvey – The Glorius Land (Let England Shake, 2011)
El so meyor discu. Siempre que lu siento emocióname. Ye señardá pura. Gústame especialmente la so producción y la voz de PJ que, nesti discu, siempre me suena distinta. Tuvi la suerte de vela amás en directo. Una maravIya.
3. Xaime Martínez – Discursu de Belarmino Tomás énte los soldaos mentes camina sobre les agües del ríu Nalón (Ósculos d’Agua nel Imperiu asturianu, 2018)
Pa min Xaime ye ún de los músicos más interesantes de la música asturiana. Esti discu-llibru ye una maraviya y esti tema, en concreto, más. Xuega cola historia de Belarmino Tomás, que cuando tuvo exiliáu trabayó vendiendo alpargates. Encántame’l so humor y l’universu de Xaime.
4. Nacho Vegas – Nuevos planes, idénticas estrategias (Desaparezca aquí, 2006)
Nacho tien temazos en tola so discografía, pero esti tema ye xenial. Namás los primeros versos del tema yá merecen un discu enteru pa ellos. La mio favorita de Vegas.
5. Christina Rosenvinge – Romance de la Plata (Un hombre rubio, 2018)
De Christina gústame too como artista. La música, les lletres, los llibros qu’escribe, les reflexones que fai sobre la música, sobre la muyer na música… Pa min ye un referente absolutu que tamién m’acompaña dende’l so primer discu en solitario colos Subterráneos. Una compositora escelente.
6. Dominique A – Je t’ai toujours aimeé (A L’arrivée 2002)
A Dominque A descubrílu n’El Guetu, el café de Carmela na cai San Antonio de Xixón. Ellí pinchábenlu muncho y pasóme como con Hersh, namoréme de la so música apasionada y siempre dalgo triste. Dende aquella acompáñame.
7. La Bandina – Valse Coxu (13, 2008)
Cuando escuché per primer vez a La Bandina gustáronme tanto que poder collaborar con ellos foi daqué que me fixo munchísima ilusión. Amás proponiéronme qu’escribiera la lletra d’esti “Valse Coxu” y foi la primer vez qu’escribí n’asturianu. Por too ello, esti tema ye mui importante pa min y sobre too porque foi’l principiu de la mio collaboración y amistá con David Varela, que ye un músicu con enorme talentu al qu’almiro munchísimo y col que tengo la suerte de llevar tocando dende aquella.
8. Llevólu’l sumiciu – Muncho Quixera Tener (Entaína, 2021)
Otru de los proyectos musicales que más m’interesaron nos últimos tiempos equí n’Asturies. Gústame muchísimo como reinterpreten la música tradicional y onde la lleven. Esti tema en concreto, que se basa na versión d’Anabel Santiago, y creo que ye una rellectura guapísima del cantar, reforzando esa tristeza que yo siempre siento cola tonada.
9. Pixies – Where is my mind? (Surfer Rosa, 1988)
Ye un hit xeneracional. Pásame un poco como col “Let Engand Shake”, ye un tema mui emocional enllenu de señardá y de rabia. Siempre que lu siento maravíyame lo cenciello que ye y lo fondo que caltria.
10. Felpeyu – Los fayeos de Mayo (Yá!, 2003)
Pues otru hit xeneracional, esti amás asociáu pa siempre al recuerdo d’Ígor y Carlos (que foi quien m’enseñó a tocar el baxu) al que yo sumo amás el de Yoli Huergo. Nellos tres pienso siempre que la escucho. Un temazu con una melodía y una lletra preciosa.
11. Muyeres – Laura Laureada (Humanes 2021)
El proyectu Muyeres gústame especialmente. Tien muncha fuercia y ver a toes eses muyeres enriba l’escenariu, con esa enerxía y esi discursu de recuperar la visibilidá de les muyeres na música, paezme mui necesario. El so montaxe últimu, Humanes, emocionóme mucho en directo, especialmente esti cantar.
12. Mariluz Cristobal Caunedo – Onde la nublina Posa (Hadas, 2004)
Gustaríame poner nesta llista la versión d’esti tema que faen Anton Menchaca, que ye ún de los mios grupos favoritos que canten n’asturianu, pero nun la tienen xubida a Spotify, asina que dexo equí’l tema interpretáu por Mariluz que ye pa respigase entera.
13. Elias García & Mapi Quintana: Josefa- Arriba Limón (Severina, 2014)
Esti discu escuchélu muncho de la que salió. Encantóme la so delicadeza y elegancia. Ye otru de los mios favoritos de la música fecha n’asturianu.
14. Beach House – Myth (Bloom, 2012)
Podía escoyer cualquiera d’esti discu. Escuchélu abondo nel embarazu del mio segundu fíu, Mael, y sé cada acorde y cada melodía de memoria. Coses alucinantes de la maternidá, cuando lu presentaron nel Niemeyer al poco, nun fuimos, y siempre, siempre, va pesame nun facelo.
15. Fee Rega – Barrio (2022)
Ye una de las artistes que dio Asturies nos últimos tiempos que más me gusta. Pura poesía y sentíu del humor. Encántame la so música y gústenme tovía más les sos lletres.
16. Viuda –Alleraná (2021)
Ún de los últimos grupos d’Asturies que más me prestó son Viuda. Encánteme’l so rollu irreverente y escuru.
17. Caetano Veloso – Maria Bethania (London, London, 1978)
Nun ye la mio canción favorita d’él pero el London London sí ye ún de los mios discos favoritos y en particular, esti tema qu’escribió a la so hermana, la cantante María Bethania, siempre me fascina.
18. Nacho Fonseca (Xentiquina) – La Serena ( Xentiquin Crew, 2011)
Nacho Fonseca ye una de les mios grandes inspiraciones cuando escribo pa la reciella. Xentiquina y Seliquín son pa min un faru. Enllazo la versión que fiximos Pauline de la Serena, que ye una de mios favorites, porque nun ta la orixinal en Spotify.
19. Aldous Harding – Fixture Picture (Designer, 2019)
Ye de lo que más toi escuchando últimamente. Col tiempu cuesta abondo atopar nuevos descubrimientos musicales, asina que pa min esta música foi un gran descubrimiento hai unos años.
20. Explosions in the sky – The Moon is Down (Those who tell the truth sall die, those who tell the truth shall live forever, 2001)
La mio canción d’amor. Vilos en directo en Manchester y foi ún de los meyores conciertos que vi na mio vida.
