La Banda Sonora de Mapi Quintana
Mapi Quintana ye ún de los nomes más destacaos de la escena jazz asturiana. Nacida nel conceyu L.lena y con estudios universitarios musicales cursaos nel Conservatoriu d’Ámsterdam, lleva 25 años formando parte de proyectos rellacionaos col jazz, cola música tradicional asturiana y cola improvisación. En 2009 asoleyó’l so primer discu en solitariu, ‘El Sonar de les Semeyes’, que supunxo toa una novedá dientro del jazz y la música de raigañu. Amás d’ésti, tien otros ocho trabayos publicaos tanto participando xunto a formaciones como Blima, Aire o Eladio Díaz Folk Ensemble, como a dúu col yá fináu músicu folk Elías García (‘Severina’); y a tríu con Michael Lee Wolfe y Jacobo de Miguel (‘Xota pa Tres’).
Con ella siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Mapi Quintana
Un discu qu’enxamás canses de sentir.
N’asturianu, TUENDA 2. Encántenme los tres discos de Tuenda, pero el 2 ye el gran favoritu. N’otres llingües, MACK THE KNIFE: ELLA IN BERLIN. Téngolu rayau.
Si tuvieres que formar parte d’otru proyectu musical, ¿cuál sería?
¿¿¿Por qué hay qu’escoyer unu??? Prestaríame muncho que me llamara Chico Buarque pa que cantara les sos canciones, pero tamién seria la repera facer un espectáculu con Martirio y Björk. Y por supuesto hubiera prestao pola vida ser del cuerpu baile y/o corista de Raffaella Carrà.
De los cantares que compusisti o interpretes, ¿cuál ye’l to preferíu?
Arriba Limón.
«El primer escenariu del que tengo alcordanza ye una banqueta en ca los mios güelos maternos una nuechebona y tenía yo 4 años»
¿Cuándo foi la primer vez que xubisti a un escenariu y que pasó enantes, durante y depués?
El primer escenariu del que tengo alcordanza ye una banqueta en ca los mios güelos maternos una nuechebona y tenía yo 4 años. Enantes, nun m’ alcuerdo si dalguien me mandara xubime a cantar una o fue iniciativa propia. Durante la actuación, prestor. Y depués, actuar delantre de xente yera ún de los xuegos más prestosos.
La primer vez que canté nuna situación de conciertu estándar foi nel institutu, na fiesta Navidá. Enantes, los nervionos buenos; durante, el mesmu prestor de cuando yera guah.a y depués, la certeza de que nun diba parar de facer música na vida.
¿Qué ye lo más inxusto de ser artista?
Nun me pueo quedar con una inxusticia sola, así que equí va una mini-llista:
- La precariedá llaboral
- El prexuiciu de la sociedá pa colos/es profesionales de la música y en xeneral pa colos/es profesionales de les artes. Tovía nun se ve como un trabayu seriu que suma dalgo valioso a la sociedá.
- El nulu reconocimientu como industria sólida de la que viven munches persones a nivel mundial, sobre too artistes que nun tamos avezaos a escuchar/ver nos medios de comunicación.
Si fueres Conseyera de Cultura, ¿qué son les primeres coses que fadríes?
- Descentralizar la actividá cultural de la zona centru d’Asturies.
- Premiar a los ayuntamientos que programen actividá cultural variao y a los que nun programen actividá cultural, penalizalos.
- Meyorar el circuitu de música de músicos profesionales (cachés, altes a la seguridá social, seguridá nel espaciu de trabayu…).
- Esterminar la llei d’espectáculos que prohíbe los conciertos en cualquier llocal públicu – yá sea un chigre, una peluquería, un muséu, una tienda d’ultramarinos, lo que pinte. Permitir y fomentar eses manifestaciones artístiques tamién en sitios a priori non destinaos a facer música, siempre que se respeten les condiciones llaborales y/o de seguridá ciudadana.
- Esterminar los concursos de tonada.
«El grandísimu emburrión a facer música asturiana foi ver cómo nel estranxeru s’asimilaba la nuestra cultura colos tópicos culturales españoles más cañís»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
El grandísimu emburrión a facer música asturiana y/o n’asturianu foi ver cómo nel estranxeru s’asimilaba la nuestra cultura colos tópicos culturales españoles más cañís y eso dábame pena, rabia y noxu. El grupu que me marcó’l camín pa facer la música que vengo faciendo dende’l 2008 ye TUENDA.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
De too lo que escucho estos díes, nun hai ná inconfesable.
¿A qué personaxe públicu convidaríes a un conciertu tuyu, a pasar llueu pel backstage y pa qué?
A Martirio, pa que me contara que-y pareció el mi conciertu (porque va ser honesta) y cómo ve ella la vida en xeneral y la música en particular.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Nun ta n’asturianu, pero paezme qu’una traducción al asturianu de “Carboneras” d’Aitana Castaño y Alfonso Zapico ye xusta, necesaria y urxente. Y por supuesto ¡¡¡pídome facer la música de la película!!!
Asina fala Mapi Quintana de los cantares qu’escoyó pa la so playlist
1. “La leyenda del tiempo” – Camarón de la Isla.
Cantar esti poema con esta melodía enriba la grabación de Camarón ye de lo más lliberador qu’esperimento estos díes.
2. Sin Reme“Suite No1. En Sol Mayor” de J.S. Bach – Pau Casals.
Esta música ye la que me devuelve la calma cuando ta’l día mui torcíu y nun veo salida.
3. “Kind of Blue” – Miles Davies.
Esti discu enteru y especialmente esti tema, pónenme a funcionar la cabeza y actívenme ‘l modu creativu.
4. “Construçao” – Chico Buarque.
Esti cantar tienlo too sublime: la lletra, la melodía, los arreglos, la forma… El xuegu que fai cola lletra ye d’una intelixencia superior. La orquestación y los arreglos vocales son d’otru planeta.
5. Alfonsina y el mar” – Mercedes Sosa.
Esta canción y esta versión de Mercedes Sosa son fundamentales. Recuérdanme a mi güela Gelina que quería que yo la deprendiera cuando era una chavalina. Na adolescencia parecíame un rollu, pero col tiempu fízose una de les mis grandes favorites.
6. “Summertime” – Ella Fitzgerald & Louis Armstrong
Tovía m’alcuerdo de cómo me impresionó esto la primer vez que lo sentí. Esti discu con les voces de Ella y Louis, y los arreglos de Russell Garcia, ye una maraviya.
7. “It’s not up to you” – Björk.
El discu onde ta esti cantar (Vespertine) escuchábalu munchísimo nos primeros años que viví n’Ámsterdam, préstenme tolos cantares d’él.
8. “Nós” – L-R.
Encántame poner L-R pa baillar a too lo que doi, pero cuando llega la gallegada de “Nós” hai que parase a escuchar, porque esa melodía son fueos artificiales.
9. “Ramu de Vidal” – Tuenda.
Les improvisaciones impecables de Pepín, l’ acompañamientu rítmicamente perfeutu y dinámicu d’ Elías y la enerxía na voz d’ Ambás, too sobre un solu acorde, paécenme una fantasía.
10. “Romance del Penitente” – Tuenda 2.
Lletra mui truculenta cola que nun nos solíen deleitar muncho nos conciertos, pero musicalmente ye una ayalga.
11.. “Boda ya muñeira de Tormaleo” – Tuenda 3.
L’acompañamientu d’ Elías nesti cantar ye genial.
12. “Los Gochinos” – Xentiquina
Soi fan absoluta d’esti cantar veganu y proanimalista estremu. Apoyu total a la xente animalista que vive nes zones rurales, por ser lo más incomprendío y marciano de los pueblos.
13. Xiringüelu – Rodrigo Cuevas.
Ye la que más me presta tocar y baillar nos conciertos de Rodrigo Cuevas.
14. “Canteros” – Felpeyu.
La lletra d’ esti cantar y sentir la voz de Dudu Puente, emociónanme y respíganme de guapura.
15. “Las L.laranxas de Balsera” – Dual IgorMedio y Lisardo Prieto.
Cantar mui prestosu d’ún de los discos fundamentales de la música asturiana y n’asturianu.
16. “Hasta tu ombligo y volver” – Carlos Pizarro.
Del primer discu de Carlos Pizarro (La Voz del Árbol) escueyo’l tema qu’abre’l discu. Aprovecho pa reivindicar más espacios de calidá pa sentir a Carlos Pizarro en directo y a los cuatro siguientes músicos que nomo a continuación, toos asturianos.
17. “Correa de Ventilador” – Jacobo de Miguel.
Esti dúu atómicu que fai con Ton Risco tien temazos como esti escritu por Jacobo.
18. “Drops of Change” – César Latorre.
Un tema del segundu discu de César que ye un prestor por tol xuegu rítmicu del acompañamientu y la armonía que ye una guapura.
19. “Movimientu 4. Habanera” – Eladio Díaz.
Esta melodía ye prestosísima de cantar. Ye la pieza de la suite entera que más disfruto, los arreglos son preciosos y dan espaciu pa que todos podamos aportar dalgo nuestro.
20. “Pasearemos bajo la lluvia”- Marco Martínez
Escueyo esti temón que ye ún de los mis favoritos del so primer discu.
