La Banda Sonora de Silvia Quesada

Silvia Quesada ye una de les voces más destacaes de la música asturiana. Nacida en Brañameana en 1986, entamó a cantar dende bien moza en formaciones folk como Los Gatos del Fornu, Blima, Muyeres y Tejedor. La so carrera en solitario principió en 2014 cola publicación de ‘La Pena Abierta’, un discu de canción d’autora que la consolidó como una de les meyores cantantes del país. Nel so segundu trabayu, ‘Prefiero Ver Llover‘, l’artista lleva a la música n’asturianu a esplorar nuevos caminos sonoros, faciendo un pop eléctricu y enllenu de color que llevó’l Premiu AMAS a Meyor Discu d’Otres Escenes.

Con ella estrenamos la estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevista escueye los 20 cantares -12 n’asturianu y 8 de fuera- que más-y presten.

Sienti la playlist La Banda Sonora de Silvia Quesada

Un discu qu’enxamás canses de sentir.

Si falamos de música n’asturianu, “Dual” d’Igor Medio y Lisardo Prieto.

Si tuvieres que formar parte d’otru proyectu musical, ¿cuál sería?

Gustaríame dalgo coral, lo mesmu averáu al folk qu’al pop, pero siempres cola armonía vocal presente.

De los cantares que compusisti o interpretes, ¿cuál ye’l to preferíu?

“La pena abierta”. Foi’l primeru que ficimos pal mio proyectu en solitariu y téngo-y munchu ciñu; creo que tanto por temática como por estilu defín perbién a Silvia Quesada.

«La persona cola que más m’identifico na música ye Guadi Galego»

¿Cuándo xubisti per primer vez a un escenariu y que pasó enantes, durante y depués?

Foi na Festona (La fiesta de La Espina) nel añu 94, tenía 8 años. Yo taba nun grupu de baille tradicional d’ellí y enantes d’actuar tuvi que xubir al escenariu a entregá-y un premiu a Hevia. Durante l’actuación namás taba pensando en nun cayer del escenariu abaxo, dábame miéu nun controlar, cayer y facer el ridículu. Depués, como día hestóricu que yera, facer fotos con tola familia y amigues vistía col traxe rexonal per primer vegada.

¿Qué ye lo más inxusto de ser artista?

Hai munches inxusticies y yo voi cambiando de paecer colos años. Anguaño, creo que lo peor ye la inestabilidá na que vives si quies dedicate namás a la música, a lo menos nel mio casu.

Si fueres Conseyera de Cultura, ¿qué son les primeres coses que fadríes?

Fadría una rede de conciertos pa los artistes asturianos na que tol mundu tenga la oportunidá de participar; prestaríame que fueran los ayuntamientos que te contraten los que te den d’alta na Seguridá Social y que nun tenga que facelo’l propiu artista; y tamién me paez impresdindible una mayor publicidá de calidá nos medios. La televisión pública tien que servir pa la difusión de la música que se fai nel país.

«Convidaría a un conciertu al Ministru de Cultura pa charrar con él de la complicada situación que vivimos los que pertenecemos a esta industria»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Siempres cuento que la persona cola que más m’identifico na música ye Guadi Galego, tengo la impresión de que tuvimos unes carreres bastante paraleles -salvando les distancies-; les dos entamamos cola gaita y la pandereta y cantando en grupos de folk, ella en Galicia y yo n’Asturies. Y cuando la vi en directo con un proyectu ayenu al folk pero apostando pol gallegu igualmente, paecióme que yera’l camín que yo podía siguir tamién.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Alejandro Sanz…

¿A qué personaxe públicu convidaríes a un conciertu tuyu, a pasar llueu pel backstage y pa qué?

Ocúrrenseme munches persones a les que convidaría a ver un conciertu míu y poder falar depués con elles; pero, anque sólo seya por intentar ayudar al sector, prestaríame que viniera’l Ministru de Cultura y poder charrar depúes con él de la complicada situación que vivimos los que pertenecemos a esta industria y que lo vea de primera mano, pa ver si poco a poco camuden les condiciones que tenemos.

Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?

Barriendo un poco pa casa, creo que sedría interesante una película del llibru “Crónica de la lluz y la solombra”, del tinetense, como yo, Antón García. La hestoria desendólcase na villa de Tinéu y narra un axusticimientu públicu que se fizo xustamente onde yo vivo agora.

Discos de Silvia Quesada na tienda online y plataformes dixitales


Dexa un comentariu

X