Esti xueves 4 a les 19.30h continúen nel Centru de Cultura Antiguu Institutu de Xixón los Alcuentros de Músiques Asturianes. Nesta ocasión va haber un conciertu del dúu formáu pol músicu asturianu Ún de Grao y el lleonés Rodrigo Martínez, dambos venceyaos a la música tradicional de los sos territorios dende cuantayá. Pa conocer más de la propuesta falamos con José Martínez d’Ún de Grao.
¿Cómo surdió esta iniciativa?
A Rodrigo Martínez conocílu en Lleón, nun conciertu que dimos Degañan’s y nel que collaboraron Tarna. Charrando con ellos acabé faciendo muncha amistá con Rodri y d’entós pacá coincidimos más vegaes y entamamos a quedar pa tomar dalgo y venos. Tenemos muncho respetu y almiración pola música que fai caún, asina qu’al final foi dalgo inevitable qu’acabáremos faciendo dalgo xuntos. Pel momentu dimos un conciertu en Lleón n’ochobre y esti de Xixón va ser el segundu.
¿Qué va poder sentise na actuación?
Básicamente lo que facemos son canciones d’él acompañaes por mí nes que meto dalgún coru y míes acompañaes por él, sobre manera col bouzuki, faciendo coros y en dalguna tamién mete xiblata, que lo que toca ye un low whistle. Él tira muncho de técnica de bouzuki, tocando con púa, mui rítmicu, mui rápidu; y yo tiro muncho de técnica de mano derecha, d’arpegio.
«Si nos xuntamos y si cuadra esti proyectu ye porque tenemos una manera mui asemeyada de ver la música y el trabayu cola tradición. Cualquiera de los dos proyectos afuxe bastante clara y conscientemente del típicu soníu folk celtista»
¿Qué repertoriu interpretáis?
Les canciones míes son toes asturianes. Hai tonaes, l’añada de ‘Nun Llores Nin’, la danza de ‘¿Ónde vas a por agua?’ y un aguilandu de Tormaleo d’Ibias que nun lo tengo asoleyáu, que toqué en mui pocos conciertos y que va facelo Rodrigo conmigo. Y llueu a él voi acompañalu en trés pieces tradicionales del norte de Lleón, anque bono, eso de les llendes a mí préstame plantegalo como relativo, porque la llende ye una llinia nun mapa y la realidá de la cultura trespasa pa ellí y pa equí.
¿Cuál ye’l puntu d’alcuentru ente les dos propuestes?
Si nos xuntamos y si cuadra esti proyectu ye porque tenemos una manera mui asemeyada de ver la música y el trabayu cola tradición. Cualquiera de los dos proyectos afuxe bastante clara y conscientemente del típicu soníu folk celtista. Lo mío tiro muncho al rock setenteru, sobre manera, y tamién a la música de cantautor, en dalgunos acordes hai dalgo más tipo jazz o brasileiro… y anque nun afondo muncho nes estructures de calter progresivu, nótase muncho que na mio educación musical ta mui presente la música setentera d’esos grupos de rock progresivu: Pink Floyd, Supertramp, Queen, Dire Straits, etc. Pues na música d’él, de dalguna manera tamién ta presente, pero d’otra manera. Nun trabaya les coses igual que yo; trabaya armodíes distintes, pero sí que tán mui presente eses estructures… sientes canciones d’él y ye progresivu, tien unes estructures complicadísimes…
Los dos proyectos creo que comparten eso, el puntu de vista mui estremáu pa lo que ye’l modelu dominante nel folk d’influencia celta. Pa mí ye un proyectu mui ilusionante porque me resulta divertidísimo y y un reto ensayar temes d’él, que son complicadísimos, y tengo una verdadera y profunda almiración polo que fai, amás de que tenemos una sintonía personal mui importante.
Suscríbite a les nuestres novedaes
