La Benéfica de Piloña va recibir esti xueves, 29 d’ochobre, en Bilbao, el reconocimientu AUPA! 2026 na categoría d’espaciu de música en directu. El galardón, que s’entrega nel marcu de BIME, pon en valor el trabayu de los espacios que apuesten por nueves propuestes musicales, la calidá artística y el compromisu social y ambiental.
Asitiada en L’Infiestu, La Benéfica ye un espaciu cultural que combina tradición y contemporaneidá, con una programación que busca dinamizar la vida cultural de Piloña y del oriente asturianu. La música ocupa un llugar destacáu na so actividá, con propuestes de distintos estilos y procedencies, ente elles actuaciones que contribúin a dar visibilidá a la música n’asturianu.
El proyectu recupera una nave histórica venceyada a la Sociedá de Socorro Mutuo La Benéfica de Piloña, fundada en 1926, y da-y una nueva vida como espaciu d’alcuentru, creación y participación cultural. La so filosofía combina l’actividá artística col trabayu comunitariu y la defensa de la cultura nel mediu rural.
La entrega va celebrase nel Palaciu Euskalduna de Bilbao a les 12:30 hores, dientro de la tercer edición de los reconocimientos AUPA!, que distinguen a persones, proyectos y entidaes que contribúin al desenvolvimientu de la industria musical.
Suscríbite a les nuestres novedaes
