La selmana pasada cumpliéronse 50 años de la muerte del dictador español Francisco Franco y el Ministeriu de Política Territorial y Memoria Democrática d’España ta entamando dellos actos pa reivindicar la vida en democracia. Estes actividaes aporten a Asturies esti domingu 30 dende les 10.30h Radio Barullu: 50 años de cultura asturiana, una gala interdisciplinar na que la música’l país va tar mui presente pa repasar la evolución cultural del país dende 1970 hasta anguaño.
La escritora música y poeta Ana Lamela, la cantante y compositora Marisa Valle Roso, el colectivu de música tradicional Muyeres y el músicu y axitador cultural Rodrigo Cuevas van ser les persones venceyaes a la música n’asturianu que participen nesta actividá. Xunto a elles tamién van tar la delegada del gobiernu español n’Asturies, Adriana Lastra; la cantante y acordionista de Grupo Beatriz, Beatriz Rodríguez y Gabriel Fernández; la historiadora, documentalista y escritora, Pilar Sánchez Vicente y más participantes por anunciar. L’eventu van presentalu la periodista Aitana Castaño y el diseñador gráficu y comunicador Sergio Dosal, cola collaboración del CEIP L’Ablanu.
«Ye un viaxe sonoru y escénicu que recorre cada década dende los 70 hasta güei pa celebrar ‘España en llibertá – 50 años’. La gala pon en xuegu pasáu, presente y futuru. Ye un eventu imprescindible pa vivir en directo, con voces que formen parte de la historia cultural d’Asturies«, despliquen dende La Benéfica de Piloña dexando tamién clara una alvertencia: «Ye de baldre, pero l’aforu ye llendáu… asina que si queréis asitiavos na platea, entainái»
Suscríbite a les nuestres novedaes
