En mayu de 2023 el cuartetu de bal-folk La Boturné asoleyó’l so primer trabayu discográficu, A Contraforga, dempués de dellos años pisando escenarios de dientro y fuera d’Asturies. Tres d’escosar la primera edición, esta banda formada polos veteranos músicos Merce Santos (zanfona), David Varela (voz, acordión y percusión), Santi Caleya (saxu sopranu y gaita) y David Casillas (Contrabaxu), llanza la segunda tirada del CD. Amás, anunciaron a traviés de les stories d’Instagram les doce primeres feches de conciertos pa 2025.
Llangréu (2 de febreru), Grau (15 de marzu), Villaviciosa (10 de mayu), Tinéu (18 de mayu), Carreño (22 de mayu), Cangas del Narcea (23 de mayu), Nava (30 de mayu), Cabranes (28 de xunu), amás d’Avilés, Llanes y Mieres, son les feches que La Bonturné anuncia pa los sos próximos meses. Dalgunes d’elles prográmense gracies a que ganaron el pasáu payares el XVI Premiu Camaretá al Meyor Cantar con ‘Odisea la Nuí’ y a entrar d’esta manera nel circuitu Autores nel Camín promovíu pol gobiernu asturianu.
Nestos eventos va poder mercase la segunda edición del trabayu que’l grupu tien publicáu hasta la fecha, A Contraforga. Grabáu y mezcláu nos Tutu Estudios por Sergio Rodríguez, el discu amuesa’l bon facer d’esta formación que lleva cerca de tres décades compartiendo llabor n’otres agrupaciones como La Viga Travesá, La Bandina les 47, Folkgando, Pauline en la Playa o La Bandina. Esti discu parte del conocimientu bien fondu de la música tradicional y los sos instrumentos, a caballu d’un son prestosu y singular, y apurre un repertoriu amañosu dafechu pal baille, nuna llinia bal-folk tradicional.
Suscríbite a les nuestres novedaes
