El Conceyu d’Uviéu vien de presentar «Puxa’l Barriu. Arte qu’habita», un programa que busca convertir los centros sociales municipales en espacios vivos de creación, participación y mediación cultural. La iniciativa forma parte de la candidatura d’Uviéu a Capital Europea de la Cultura 2031 y supón un pasu más na estratexa d’una cultura cercana, inclusiva y integrada na vida diaria de los barrios.
El proyectu enmárcase dientro del Plan Estratéxicu de Cultura d’Uviéu (PECO 2035) y plantea la puesta en marcha de residencies artístiques en distintos puntos del conceyu, mesmo en zones urbanes como en rurales. L’oxetivu ye descentralizar la cultura y facilitar l’accesu de la ciudadanía a procesos creativos, fomentando al empar la participación activa y la cohesión social.
Puxa’l Barriu va funcionar como un programa paragües que va acoyer iniciatives de disciplines diverses como la danza, el teatru, la música, la fotografía o les nueves tecnoloxíes. Los y les artistes van trabayar mano a mano cola vecindá, favoreciendo procesos compartíos nos que la cultura non solo se consuma, sinón que se construya colectivamente.
Dende’l puntu de vista musical, esta iniciativa abre un escenariu especialmente relevante pa la música asturiana. La posibilidá de desenvolver residencies en centros sociales implica que músicos y creadores van poder trabayar directamente col públicu, probar nueves formes de creación y afitar vínculos col territoriu.
Esto puede traducise en dellos beneficios claros, como la mayor visibilidá pa proyectos musicales locales, espacios pa la esperimentación y la mestura d’estilos, la creación de nuevos públicos dende la base o la implicación directa de la comunidá nos espacios musicales. Amás, el contactu colos barrios facilita la recuperación y reinterpretación de la tradición musical asturiana dende una perspectiva contemporánea, daqué clave pa la so evolución y supervivencia.
El primer proyectu del programa, «Huellas«, entama en mayu nos centros sociales de Buenavista y La Corredoria. Centráu na fotografía y la memoria colectiva, va permitir a los participantes trabayar con imáxenes d’archivu y rellatos personales pa reinterpretar el so entornu. Anque nun ye un proyectu puramente musical, sí sienta les bases d’esi modelu participativu que depués va poder treslladase a otres disciplines, incluyida la música.
Suscríbite a les nuestres novedaes
