Hai poco más d’un añu Marisa Valle Roso llanzó Cenicientes, el so cuartu álbum y el que supunxo la so consolidación, llevándola recibir dellos reconocimientos y a xirar per dientro y fuera d’Asturies. El próximu 20 de payares l’artista llangreana va publicar la Edición Acebachi del discu qu’inclúi trés temes inéditos y dos remixes. Amás, va presentalu’l sábadu 21 a les 13h en L’Espaciu de Puru Remangu / Musicasturiana.com en Xixón con una entrevista en directo, actuación acústica y venta y firma de CDs.
«‘Brañavara’ ye un cantu que tien cierta denuncia social y que la faigo a traviés de la historia d’Amparo López, que ye la bruxa de Brañavara«, desplica Valle Roso al rodiu esti cantar inéditu que ta producíu por Juan de Dios y que tien «un aire bastante electrónicu y escuru«. L’otru tema que nun asoleyara entá ye ‘El gatín y la raposa’: «propúnxe-y participar nesta edición nueva a Rodrigo Cuevas, xuntámonos una día en casa d’él y como los dos venimos del folclor y nos amamaos a l’asturiana, quiximos facer una canción dialogada«. «Dempués de tar sintiendo clásicos de canción dialogada, ficimos la nuestra propia tonada cola so picaresca y que queda como esta fábula del gatín y la raposa», añade l’artista llangreana.
Cenicientes (Edición Acebachi), tamién recueye los otros trés temes que yá publicara -dos d’ellos, remixes) nesti tiempu en plataformes dixtiales: ‘Acebachi‘ -inspiráu nel cantar tradicional ‘Perlindango’ y que na so creación participaron Xosé Ambás, Cristina Len y Yoel Molina de Casapalma-; la remestura que fizo’l dúu d’electrónica de raigañu Llevólu’l Sumiciu de ‘Al Molín’ y ‘El pañuelín (Rework)’, una revisión d’esta versión electrónica del popular cantar d’El Presi nel que collaboren Alba Morena y Rocío Márquez.
Col llanzamientu de Cenicientes (Edición Acebachi), Marisa Valle Roso sigue dándo-y continuidá al so trabayu más completu qu’asoleyó en setiembre de 2025. Ta formáu por diez cantares qu’entemecen el folk col pop y los instrumentos electrónicos y nel que-y canta al feminismu, a la llucha pola xusticia social, a la reivindicación de la memoria colectiva asturiana y de la so identidá. Tamién afonda no más personal, dedicando’l so espaciu a la salú mental, el gran problema de la sociedá del sieglu XXI. La bruxería, el feminismu, la tradición y la electrónica complementen esta edición nueva que va salir en CD y en plataformes musicales el próximu vienres y de la que va poder conocese más na presentación gratuita del sábadu en L’Espaciu.
Suscríbite a les nuestres novedaes
