La Conseyería de Cultura, Política Llingüística y Deporte ta acabante d’abrir una convocatoria pa que proyectos musicales asturianos puedan presentar la so candidatura pa participar en Showcase Scotland 2027, el principal alcuentru profesional de música folk y tradicional que se celebra nel marcu del festival Celtic Connections, en Glasgow (Escocia). La iniciativa surde gracies a qu’Asturies va ser el país convidáu na edición del añu qu’entra.
La convocatoria va permanecer abierta hasta’l 7 d’agostu y les persones y formaciones interesaes pueden presentar la so candidatura al traviés del formulariu habilitáu, nel siguiente enllaz: https://forms.cloud.microsoft/e/Y2GgME8RJV. En cuantes remate’l plazu, les solicitúes van unviase a la dirección artística del eventu, que ye la encargada d’escoyer los seis proyectos que van actuar en Glasgow ente’l 20 y el 24 de xineru de 2027, dientro de la programación oficial del festival. La Conseyería de Cultura nun va intervenir na valoración artística nin na selección final, que va corresponder esclusivamente a la organización del certame.
Caún de los proyectos escoyíos va poder ufrir una actuación d’unos quince minutos dientro de la programación oficial del Showcase Scotland 2027, un formatu concebíu pa presentar el so trabayu énte profesionales, festivales y programadores internacionales de la escena folk y de músiques de raigañu. Asina favorécense oportunidaes nueves pa la música asturiana nun eventu que constitúi ún de los principales escaparates internacionales d’esta escena, axuntando cada añu a representantes de numberosos países.
La participación d’Asturies como país convidáu forma parte de la estratexa de la Conseyería de Cultura, Política Llingüística y Deporte pa reforzar la internacionalización de la música asturiana y ampliar les oportunidaes de promoción esterior d’esta industria. Amás de la presencia de les formaciones escoyíes, el gobiernu asturianu va desenvolver acciones de promoción cultural en collaboración cola organización del eventu.
El festival celébrase en Glasgow, reconocida pola UNESCO como Ciudá de la Música, un distintivu que respuende al so compromisu cola creación, la diversidá cultural y la protección del patrimoniu musical como elementu central de progresu y dinamismu. El Celtic Connections axunta cada añu a más de 1.000 artistes nuna programación que s’estiende a lo llargo de cientos d’actividaes y qu’atrái de forma sostenida a más de 100.000 espectadores.
Suscríbite a les nuestres novedaes
