La Conseyería de Cultura, Política Llingüística y Deporte estrenó’l fin de selmana’l primer circuitu cultural dedicáu dafechu a la cultura sidrera asturiana, una llinia de programación nueva integrada dientro d’Asturies, Cultura en Rede. Nesta primer edición van programase nel segundu semestre de 2026 más de 56 actividaes per 28 conceyos vinculaes a ún de los patrimonios culturales más singulares y reconocibles d’Asturies. La música’l país va tar presente cola participación de La Xarangana y l’Asociación d’Intérpretes de Canción Asturiana (AICA).
«Hay llugares que nun se despliquen, vívense. El chigre asturianu ye ún d’ellos: esi templu profanu onde la sidra cuerre talo que’l tiempu en branu, les gaites suenen ensin pidir permisu y la xente canta porque sí… o porque yá ye tarde abondo pa nun lo facer. La Xarangana enfotóse n’embotellar esi espíritu y llevalu de xira col so proyectu esplosivu: Live Chigre Music. Más qu’un conciertu, esto ye un ritual popular reinventáu. Un pasucáis que se cuela nos escenarios. Una verbena antroxada d’espectáculu. O quiciás al revés. Porque equí conviven, ensin escandalizase, la muñeira y el rock, l’alborada y el pop, la xota y la rumba, como si tuvieren coincidío na barra y pidieren una ronda conxunta», con eses pallabres présentase l’espectáculu nuevu de La Xarangana que tien la so próxima fecha confirmada pal 24 d’agostu n’Arenas (Cabrales).
D’otra banda, l’Asociación d’Intérpretes de Canción Asturiana (AICA) va llevar la propuesta Ente Tonaes y Cancios a los conceyos de Bimenes, Castrillón, Riosa y Somiedu, anque entá nun tán confirmaes les feches. Nestes actuaciones, va poder sentise’l venceyu ente cultura sidrera y asturianada.
La puesta en marcha d’esta acción, que forma parte del plan plurianual d’actuaciones promovíu pol Executivu autonómicu, produzse depués de la declaración de la cultura sidrera asturiana como Patrimoniu Cultural Inmaterial de la Humanidá pola UNESCO, un reconocimientu internacional a una tradición fondamente enraigonada na identidá, la memoria y les formes de vida d’Asturies.
Con una dotación de 100.000 euros, el circuitu fai posible averar a la ciudadanía propuestes que traten la cultura sidrera dende perspectives diverses: la pumarada, la mazana, el llagar, l’echar la sidra, la tradición oral, la música, la creación escénica y los espacios d’alcuentru qu’históricamente dieron forma a esti patrimoniu mundial.
Esti circuitu súmase a Asturies, Cultura en Rede, programa que cunta nel 2026 con una dotación global de 1,74 millones d’euros, un 22% más que nel 2025, y afiánzase como una de les principales ferramientes de la Conseyería pa favorecer la descentralización cultural y garantizar los derechos culturales de la ciudadanía, como l’accesu a la programación cultural en tol territoriu. L’añu pasáu, el programa axuntó más de 1.200 actividaes en 67 conceyos.
Suscríbite a les nuestres novedaes
