La cultura de raigañu aporta a los barrios de Xixón col ciclu “Cultura Peatonal”
Del 29 d’agostu al 7 de setiembre dieciséis barrios xixoneses van enllenase de cultura asturiana gracies Cultura Peatonal, un nuevu ciclu entamáu pola estaya de Cultura y Educación del Ayuntamientu de Xixón. Bandes de gaites, agrupaciones folclóriques, xuegos tradicionales, teatru n’asturianu y tamién dalgunes actuaciones musicales dan forma a una programación con más de 50 eventos, desendolcada en parques y places y que pue consultase entera nesti folletu o na web.
«Xixón ye una villa con xente d’enfotos variaos enforma. Averar a toos ellos la cultura asturiana ye l’oxetivu cimeru d’esti programa d’actividaes venceyaes colos nuestros raigaños», comenten dende l’área de Cultura y Educación del Conceyu. Asina ye como Cultura Peotonal apuesta poles agrupaciones y artistes de Xixón y pa ello va cuntar coles actuaciones de les bandes de gaites Noega, Villa de Jovellanos, Pepe Blanco, Villa de Xixón, Garulla, Magüeta y Seronda; y de les agrupaciones folclóriques Coros y Danzas Jovellanos, Trebeyu, El Xolgoriu, Real Grupo de Cultura Covadonga, Los Xustos, La Alegría, El Turruxón y Excelsior.
Amás d’esto va haber xuegos tradicionales, teatru n’asturianu y otres actuaciones de músicos llocales como la de Dani García de la Cuesta col so Romanceru andayón y los cuentos musicaos pa tola familia, Cuentitis Aguda, d’Ana Morán y David Varela. Toles actuaciones van ser a les 12.30h y a les 20h y son gratuites. Pumarín, Montevil, Begoña, El Natahoyo, Portuarios, La Calzada, Nuevu Roces, Santa Bárbara, Roces, el Centru, Laviada, Tremañes, Ciares-El Llano, Montiana, Viesques, Pescadores y La Camocha son los distintes barrios y parroquies que van acoyer los escenarios de Cultura Peatonal.
