La música asturiana resuena en setiembre en Villaviciosa col FIG y les Xornaes Elías García

El Conceyu de Villaviciosa ye ún de los más dinámicos en cuantes a la so rellación cola música asturiana. D’él salieron músicos y formaciones que tienen abondo protagonismu dientro la escena sonora del país y dende hai años tamién acueye dalgunos eventos de renome. Nesti viniente mes de setiembre va convertise na capital de la música asturiana gracies a la 15 edición del Festival Internacional de la Gaita (FIG) que se cellebra ente los díes 1 y 4 y a les Xornaes Elías García, que van homenaxear al músicu fináu en 2019 con dellos conciertos y otres actividaes.

Esti 2022 el Festival Internacional de la Gaita de Villaviciosa (FIG) cumple 15 años y pa cellebralo van desendolcar una programación mui completa pa los díes 1, 2, 3 y 4 de setiembre. Actuaciones de bandes de gaites y bandines; conciertos folk; pandereta y baille; talleres y ponencies; mercáu; jam session; sidra; canción asturiana; y el Concursu de Gaiteros Memorial José Huerta, dan forma a les más de quince actividaes programaes pol festival qu’entama la Banda de Gaites Villaviciosa-El Gaitero y qu’esti añu recupera la so esencia dempués de facer los dos años anteriores el DesconFIGnamientu Fest en formatu d’andanciu.

Per otru llau, los díes 16, 17 y 18 de setiembre el conceyu de Villaviciosa acueye les Xornaes Elías García, eventu n’homenaxe al ornitólogu y músicu que fuera componente de Llan de Cubel, Felpeyu y Tuenda, ente otros proyectos, y que finó prematuramente en 2019. Les VII Xornaes Ornitolóxiques, un esposición dedicada a García, una plantación de monte autóctonu y conciertos dan forma a la programación.

La música asturiana protagoniza les xornaes del sábadu y el domingu. El sábadu 17 en la Plaza’l Güevu dende les 20.30h van actuar la Banda Gaites Villaviciosa, Mariluz Cristóbal Caunedo, Xuacu Amieva y Ambás ya Ramsés. Al día siguiente, el Teatru Riera acueye dende les 19h los conciertos de La Garrapiella, Loína, Herbamora, Llan de Cubel y Felpeyu. La entrada ye gratuita pa estes xornaes organizaes desinteresadamente por más de 30 persones n’alcordanza, homenaxe y agradecimientu a Elías García.

Comprar discos de gaita y folk na tienda online