La Conseyería de Cultura abre la convocatoria d’ayudes al sector de la música en 2022
La Conseyería de Cultura, Política Llingüística y Turismu publicó esti martes nel BOPA la convocatoria de subvenciones pal Desendolcu de proyectos culturales y acciones de formación y movilidá per parte de profesionales y empresas. Con una dotación presupuestaria de 570.000 euros y siete llínies d’actuación -artes escéniques, llibru, audiovisual, música, artes visuales, videoxuegos y formación-, la partida pal sector de la música ye de 100.000 euros y a esta convocatoria pueden presentase proyectos de tres tipos: pa la producción d’una obra musical; pa la realización de xires; y pa la organización de festivales y ciclos de música.
El 22 de setiembre ye’l plazu máximu pa que les empreses y profesionales puedan presentar proyectos desendolcaos o por desendolcar ente’l 1 de payares de 2021 y el 30 d’ochobre de 2022. Dientro de los criterios de valoración tiénense en cuenta aspectos como’l «interés artísticu, calidá y calter innovador del proyectu» (40 puntos), la «presencia de profesionales del Principáu d’Asturies» (10 puntos), o que más del 50% del proyectu seya n’asturianu o eonaviego (5 puntos). Tamién se valoren pa cada tipu de proyectos aspectos concretos como la trayectoria profesional, el númberu d’actuaciones, la perspectiva de xéneru o’l númberu de díes y artistes implicaos nos eventos.
Estes ayudes suponen un pasu más nes novedaes desendolcaes esta llexislatura pola Conseyería de Cultura, Política Llingüística y Turismu, ente les que s’inclúi la creación del circuitu Asturies Cultura en Rede, les ayudes pol impactu del COVID-19 nel sector cultural, la creación y celebración de tres reuniones de la Mesa Sectorial de la Música y la implicación del gobiernu asturianu nel 51 Festival Intercélticu de Lorient, protagonizáu nesta edición por Asturies.
Musica n’asturianu
Dientro del área específica de Política Llingüística destaca la reconversión del Premiu al Meyor Cantar nel Premiu Camaretá -colos 6.000 euros de premiu-; la realización del proyectu Al Son del Cantar y la eliminación en 2020 de les subvenciones pa la Promoción de la música n’asturianu y en gallego-asturianu, les úniques qu’había esclusivamente pa la publicación de música fecha nes llingües autóctones y qu’agora s’integren nestes nueves ayudes tresversales nes que’l fechu llingüísticu valórase con 5 puntos.
