El Mercáu Tradicional La Flor de L.lena, nel barriu La Caleya de La Pola, llega esti sábadu 15 y domingu 16 a la so decimoctava edición. La música’l país ye una de les grandes protagonistes d’esti eventu y nél van actuar Dixebra, Xuacu Amieva & Dobra, Algaire, Daniela Cortina, La 402, Alicia Villanueva, Luis Álvarez Pola y Odón del Paganéu, amás de les bandes, bandines y agrupaciones folclóriques Banda Gaites Güestia, La Flor de Xanzaina, Pandereteres nel Horru, L’Artusu y La Bandina’l Busgosu.,
La xornada arranca’l sábadu 15 a les 10.30h coles alboraes de gaita y tambor, que van dar pasu a les 11.30h al pasacais de la Banda Gaites Güestia y a les 12.30h al pregón que da el Coro La Flor. Cola folixa yá inaugurada, va enramase la fonte y a les 14h Daniela Cortina -que fai versiones acústiques de dellos cantares de la música n’asturianu-, va tocar na sesión vermú. Pela nuecha van rematar la xornada dos de los grandes nomes del folk y rock patriu, Xuacu Amieva & Dobra a les 22h y Dixebra a les 23h.
Un pasacais cola participación de les agrupaciones folclóriques La Flor de Xanzaina y les Xanines de Quintes va dar aniciu a la xornada del domingu a les 11h. Pa les 12.30h actúen les Pandereteres del Horru y a la una’l mediudía ye’l festival de canción asturiana Ayalgues de l’Asturianía cola participación d’Alicia Villanueva, Luis Álvarez Pola y Odón del Paganéu. Les versiones acústiques de La 402 rematen la mañana con una sesión vermú a les 14h.
Tarde en danza
La tarde del domingu 16 ye pa bail.lar. A les seis desfila’l grupu folclóricu L’Artusu de Figareo y a les siete arranca la Tarde en Danza que va tar amenizada pola BG Güestia, la Bandina’l Busgosu y les Pandereteres de L’Artusu. El zarru del mercáu van facelu Algaire que continúa xira de Coral y Maera. Un eventu perguapu y imprescindible pal calendariu de la música asturiana en vivo.
Suscríbite a les nuestres novedaes
