Musicasturiana.com participa nun alderique d’industries culturales entamáu pola University of California Riverside

Minoritized Iberian Languages: Asturian 101 Series. Baxo esti nome la doctoranda asturiana asitiada nos Estaos Xuníos, Miram Villazón Balbuena, ta entamando dellos alderiques rellacionaos cola llingua asturiana. Xicu Ariza, responsable de musicasturiana.com va participar n’ún dedicáu a les Industries Culturales. L’eventu va ser online el martes 18 a les 18h (hora d’Asturies), pue inscribise cualquier persona nesti enllaz, enmárcase dientro de l’actividá grupu d’investigación Asturian Studies – SAnTINA (Sociedá pal Análisis de Temes culturales ya Identidaes llingüístiques n’Asturies) y cunta cola collaboración de dellos centros de la University of California Riverside.

Cada eventu tien dos partes: primero una comunicación sobre’l tema del que se vaya a tratar ese día -lleía pola doctora Claudia Elena Menéndez Fernández de la Universidá d’Uviéu-; y llueu un alderique qu’axunta a delles persones rellacionaes cola materia. A lo llargo d’esti añu yá se fixeron los alderiques Llingua y Escolarización; Llingua y Archivu; y Introducción a les llingües minorizaes: l’asturianu. El d’Industries Culturales pon el ramu y nél van participar Isabel Álvarez Sancho (Oklahoma State University), Nicolás Bardio (Ediciones Radagast), Blanca Fernández Quintana (“No que cinca los seres de lleenda”), Xicu Ariza (www.musicasturiana.com) y Diego Solís (Revista Formientu).

Santina II

Per otru llau, el 3 y 4 de mayu va cellebrase Santina II, la conferencia virtual organizada por Asturian Studies y la Oklahoma State University. Nella intervienen ponentes de delles universidaes europees y norteamericanes que van facer llectures alredor de temes rellacionaos cola llingua, cultura y identidá asturiana. Estes xornaes tán coordinaes por Isabel Álvarez Sancho, profesora titular de la Oklahoma State University y vicepresidenta d’Asturian Studies, grupu de trabayu presidíu pola profesora Covadonga Lamar Prieto, y la vocal Miriam Villazón Valbuena, dambes de la Universidá de California-Riverside, qu’entamaron la primer Conferencia SAnTINA en 2021. Estes iniciatives académiques contribuyen al desendolcu del campu de los estudios asturianos y a esparder la cultura asturiana fuera de les nuestres llendes.