La Folixa la Sidre de Ribeseya ta acabante d’anunciar les bases del VI Concursu de Gaiteros Solistes «Gelu Cuervo» y del I Concursu de Pareyes de Gaita y Tambor, certámenes que se celebren el domingu 4 d’ochobre col oxetivu de siguir poniendo en valor la música’l país, amás de rendir homenaxe a una figura fundamental de la música tradicional del conceyu: Gelu Cuervo, fináu esti añu. Hasta’l 28 setiembre pueden apuntase concursantes pa esti gallardón entamáu por Entaína Ribeseya y la Banda Gaites Ribeseya.
El VI Concursu de Gaiteros Solistes «Gelu Cuervo» va desarrollase nuna única fase y va tener dos categoríes: «Gelu Cuervo», pa gaiteros y gaiteres de 16 años n’adelante, y «Duardol de Sabina», pa participantes d’hasta 15 años inclusive. El númberu de places va tar llendáu a 12 participantes por categoría y les inscripciones pueden facese hasta’l 28 de setiembre nel teléfonu 633 909 989 o nel corréu electrónicu bgiribeseya@gmail.com.
Los participantes van tener qu’interpretar temes del repertoriu de gaita asturiana. Na categoría «Gelu Cuervo» habrá que preparar un tema, mientres que na categoría «Duardo’l de Sabina» van interpretase dos temes. Amás, los concursantes han d’utilizar gaita asturiana d’un solu roncón, en cualquiera de les sos modalidaes —grillera, redonda o tumbal—, y tán obligaos a actuar vistiendo el paxellu tradicional asturianu.
El xuráu -formáu por gaiteros cualificaos venceyaos al Oriente d’Asturies,- va valorar les actuaciones atendiendo a distintos criterios: puesta n’escena, afinamientu y correctu temple del instrumentu, execución y estilu, dificultá técnica y orixinalidá de los temes. El certame va celebrase’l domingu 4 d’ochobre, a les 17h, nel marcu de la Folixa de la Sidre de Ribeseya y tien los siguientes premios: 250 €, 180 € y 100 € más trofeos na estaya «Gelu Cuervo» y 120 €, 80 € y 40 € más trofeos na categoría ««Duardo’l de Sabina»
Amás, la Folixa la Sidre de Ribeseya acueye por vez primera’l Concursu de Pareyes de Gaita y Tambor. Tamién tán abiertes les inscripciones -pela mesma vía que pal «Gelu Cuervu»- pa cualquier persona a títulu personal, ensin que seya necesariu pertenecer o representar a una banda o colectivu; anque les pareyes han de tar formaes por gaita y tambor tradicional asturianu.
Cada pareya tien qu’interpretar dos pieces: una d’elles has ser obligatoriamente de calter tradicional asturianu, mientres que la segunda va ser de llibre elección, pudiendo ser tamién tradicional asturiana. La duración conxunta de les dos interpretaciones nun podrá superar los ocho minutos y los concursantes tamién han vistir el paxellu’l país.
En cuantes a los premios, van ser de 200 €, 150 € y 100 € más troféu y diploma pa les trés primeres pareyes. Les actuaciones van valorase atendiendo a seis criterios: puesta n’escena, afinamientu correctu de los instrumentos, execución y estilu, dificultá técnica, disparidá de temes y patrones y l’empaste ente los miembros de la pareya y el xuráu va tar formáu por cuatro persones designaes pola organización: un xuez de gaita, un xuez de tambor y dos xueces de conxuntu.
Esta edición va ser especialmente emotiva, al ser la primera que se celebra ensin la presencia del gaiteru tradicional Gelu Cuervo, pero tamién ye una oportunidá pa mantener vivo’l so nome y el so llegáu musical. Asina ye como por mor del so recién fallecimientu, y como homenaxe a la so figura, los gaiteros participantes van interpretar la ‘Marcha d’Antón El Neñu’ como alcordanza enantes de la entrega de premios.
Suscríbite a les nuestres novedaes
