La Fundación Belenos entama esti fin de selmana’l XXIV Seminariu d’Estudios Asturianos en La Puela d’Allande col títulu La Gaita, l’instrumentu emblemáticu d’Asturies. Ente los díes 16 y 17 de payares, va haber ponencies, meses redondes, un conceyu abiertu y música’l país nun eventu que va afondar nesti instrumentu tradicional dende estremaes perspectives: venceyu identitariu, escolarización, aniciu de les bandes de gaites, construcción y artesanía, y acústica. El plazu d’inscripción yá ta zarráu.
Nel eventu participen dalgunos de los gaiteros y estudiosos más reconocíos: Lisardo Lombardía -Presidente de la Fundación Belenos-, Xuacu Amieva, José Ángel Hevia, Flavio Rodríguez, Fonsu Les Regueres, Sergio Linde, Pelayo Fernández y Chus Solís. Llama l’atención la falta de muyeres y de perspectiva de xéneru -nin gaiteres nin musicólogues-, un fechu davezu esmolecedor nos eventos venceyaos a la gaita, un instrumentu masculinizáu enforma y un ámbitu nel que paez que’l techu de cristal ye d’una dureza cuasique imposible de romper.
Amás de les ponencies y alderiques, na nueche del sábadu 16 va celebrase un Filandón con música’l país. Al día siguiente, Fonsu Les Regueres va amosar delles gaites antigües de la so colección. Va facelo nun conceyu abiertu que ye a les 11.30h del domingu 17, nuna actividá a la que-y va siguir un pasucáis per La Puela a les 13h. La programación completa pue consultase equí:
Suscríbite a les nuestres novedaes
