La Garrapiella asoleya ‘Esmesando’, el so primer discu
Yá ta a la venta y en toles plataformes dixitales Esmesando, el primer llarga duración de La Garrapiella. Esta bandina presenta ocho pieces tradicionales y de composición propia con abonda diversidá nel soníu. “El trabayu qu’ufiertamos resumelo’l nome del discu: Esmesando. Esmesar vien ser n’asturianu sacar la yerba de dalgún llugar. Asina podemos definir esti discu: garramos temes tradicionales, propios y d’autor, desgranámoslos bien y buscamos da-y nuesu soníu propiu y que la xente puea pasalo bien al sintinos”, comenten dende’l grupu.
D’esta manera, n’Esmensando pue sentise “dende un son d’arriba y una xota pa echar un baille a lo suelto a bailles agarraos, una tonada o unos forros brasileños”. Amás d’ello, los seis músicos que formen La Garrapiella cuntaron coles collaboraciones de les pandereteres y cantantes Algaire y del cantador de tonada Odón del Paganéu, que coles sos voces arriquen tovía más el soníu d’esti trabayu.
9 años dempués desque esta bandina entamara la so trayectoria “como formación tradicional na IX Noite Folk de Navia” y llueu de qu’en 2017 decidieren pasar a interpretar “repertoriu novedosu y poco vistu, con un soníu propiu y frescu”, La Garrapiella cumple l’oxetivu de “rexistrar nun discu aquello que foi construyéndose ente tol grupu”. Agora esta formación caracterizada por “probar coses nueves, como l’usu d’instrumentos poco usaos na música tradicional asturiana” -saxu barítonu o les gaites graves p’armonizar- y por usar “una indumentaria asturiana de los años 20 del sieglu pasáu, dómina na que les bandines taben na cresta la fola”; va presentar el trabayu en directo nel Festival Intercélticu de Lorient y nel Festival Internacional de La Gaita de Villaviciosa. Llueu siguirán esmesando y percorriendo esti camín de poner a la xente a baillar y facer que lo pase bien.
