Entama la edición del Festival Intercélticu de Lorient dedicada a Asturies

Dende güei y hasta’l 14 d’agostu va cellebrase la 51 edición del Festival Intercéltique Lorient, el más prestixosu de los certámenes del mundu celta. La edición d’esti añu ta dedicada a Asturies y, xunto a les 12 actuaciones d’artistes del país que programaron dende’l festival, súmense otres programaes pola Conseyería de Cultura, Política Llingüística y Turismu que van sonar nel Pabellón d’Asturies. Nesti espaciu de 375 m2 que tien una inversión del Principáu de 200.000 euros, tamién va haber actividaes lliteraries, una esposición de Ricardo Villoria y dellos stands pa promocionar la gastronomía y el turismu.

Mapi Quintana, Llevólu’l Sumiciu, Eva Tejedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella, Urso Dakoff y Monteavaro, Muñalén & Rodrigues; son los nomes que’l gobiernu asturianu anuncia que va llevar a Lorient. Dende la Conseyería preséntenlos como «propuestes artístiques innovadores que beben de la tradición y reinterprétenla al traviés de la fusión y usu de formatos nuevos».

Dientro d’estes actuaciones destaca l’espectáculu Música pa tornar páxaros, dirixíu por Mapi Quintana. Esta obra creada pa homenaxear al músicu fináu en 2019 Elías García (Llan de Cubel, Felpeyu, Tuenda…), va ser l’actu d’apertura de la nueche del festival, el sábadu 6 d’agostu, y va representase nel escenariu de Le Théâtre, formando parte de la programación oficial del Intercélticu. Amás de Mapi Quintana a la dirección, composición, voz y contrabaxu; tamién participen na obra César Latorre al pianu, Sonia Cartón a la voz y los teclaos; María Sanmiguel a la voz y el violín; Thomas Welvaadt a la trompeta y Juanjo Díaz a les percusiones.

L’estrenu de la esposición Llabor del artista llavianés Ricardo Villoria, qu’axunta fotografía, indumentaria y audiovisual; la participación d’escritores en llingua asturiana en charres y meses redondes lliteraries; y un espaciu destináu a la gastronomía y productos del país, al cuntar con un restaurante con zona d’escanciáu de sidra, un stand de Alimentos del Paraísu y otru d’información turística; van completar l’actividá d’esti Pabellón d’Asturies que va tar formáu por seis carpes y dos bungalows.

Programación oficial

Xunto a les actuaciones programaes pol Principáu, tán que l’Intercélticu de Lorient escoyó pal so programa oficial. El conciertu de L-R, el viernes 5 nel escenariu Le Kleub, va ser el qu’inaugure’l festival. Al día siguiente Pablo Carrera va dar una masterclass de gaita a les 10 de la mañana en Le Palais, Mapi Quintana representa Música pa tornar páxaros en Le Théâtre; Quai de La Bretagne acueye’l show Breizh-Asturies Project nel que participen Leticia Baselgas y Silvia Quesada, y entamen les actuaciones del Grupu de Baille Trebeyu y de la Banda Gaites de Llacín, que van pasar per dellos espacios de Lorient ente’l 6 y 11 d’agostu. El conciertu de Rodrigo Cuevas, el domingu 7 en Le Kleub, pon el ramu al primer fin de selmana de festival.

El xueves 11 va cellebrase la Gran Nueche d’Asturies nel escenariu LAmphi. Llan de Cubel y Hevia protagonicen a les 21.30h esti eventu central de la programación de Lorient nesti 2022. Otru de los actos más destacaos ye nel que van participar el gaiteru José Manuel Tejedor y la cantante Silvia Quesada, l’espectáculu Celtic Odysée. Nél, los díes 12 y 13 d’agostu van xubir al escenariu de Le Théâtre 18 artistes de les ocho naciones celtes baxo la dirección artística del bretón Roban Le Bars. Cerezal va dar dos conciertos -viernes 12 en Quai de La Bretagne y sábadu 13 en Le Kleub-, y el domingu 14 rematen los directos de formaciones asturianes cola actuación del tríu astur-bretón Muga en Quai de La Bretagne.

800.000 asistentes

El Festival Intercélticu de Lorient ye un referente de los festivales europeos. Dende va yá munches ediciones, cada añu axunta a más de 4.000 músicos y a alredor de 800.000 asistentes, lo que lu convierte nun gran escaparate con una importancia que va más allá del so valor musical y algama una repercusión cultural y turística bien relevante pa los países participantes. Esti añu, Asturies va ser la nación convidada d’honor per cuarta vez; tres tener esta distinción en 1998, 2003 y 2013. Amás, destaca qu’esti añu ye la primer edición que nun dirixe’l llavianés Lisardo Lombardía, quien desendolcó esta xera dende 2007 hasta 2021.

Comprar discos folk na tienda online